امتحان میں کامیابی کے بعد جب بیٹے نے سڑک پر بیٹھی ماں کو گلے لگایا تو دیکھنے والوں کی آنکھیں نم ہوگئیں۔

قوت ارادی، لگن اور محنت کے بل بوتے پر بڑے سے بڑا امتحان پاس کیا جاسکتا ہے۔حالات کتنے ہی خراب کیوں نہ ہوں، اگر حوصلہ مضبوط  ہوتو کامیابی قدم چومتی ہے۔ ایسا ہی کچھ کر دکھایا ہے سبزی فروش خاتون کے بیٹے نے ،جس نے چارٹرڈ اکاؤنٹنٹ (سی اے) کا مشکل امتحان نمایاں نمبرات سے پاس کیا۔سی اے بننے کے بعد جب بیٹے نے سڑک پر بیٹھی ماں کو گلے لگایا تو وہاں موجود راہگیروں کی آنکھیں نم ہو گئیں۔ ماں بیٹے کا جذباتی ویڈیو وائرل ہونے کے بعد نائب وزیر اعلیٰ دیویندر فرنویس اور کابینی وزیر وریندر چوہان نے بھی مبارک باد دی۔
یوگیش ٹھومبرے  اپنی ماں نیرا ٹھومبرے کے ساتھ ڈومبیولی کے کھونی گاؤں  میں رہتا ہے۔اس کی ماں  پچھلے ۲۵ ؍سال سے گاندھی نگر میں  سڑک کے کنارے ٹھیلہ لگا کر سبزیاں فروخت کرتی ہے۔ یوگیش  جب نویں جماعت میں زیر تعلیم تھا تب والد کا سایہ سر سے اٹھ گیا تھا ۔ نیرا ٹھومبرے نے انتہائی محنت و مشقت کے ساتھ اپنے ۳؍ بچوں کی پرورش کی۔ انتہائی نامساعد حالات کا مقابلہ کرتے ہوئے یوگیش نے سی اے بننے کا فیصلہ کیا اور منصوبہ بند طریقہ سے مطالعہ کیا۔پیر کے روز یوگیش اپنا رزلٹ  اور ماں کیلئے  نئی ساڑی   لے کر گاندھی نگر پہنچا۔معمول کی طرح اس کی والدہ سبزی فروخت کررہی تھیں کہ یوگیش نے اسے گلے لگالیا۔ ماں بیٹے کی محبت کا یہ نظارہ وہاں سے گزرنے والے مقامی افراد اور راہگیروں نے اپنے موبائل میں قید کیا۔یوگیش اور نیرا ٹھومبرے کا ویڈیو وائرل ہونے کے بعد کابینی وزیر رویندر چوہان نے اسے ’ایکس‘ پر پوسٹ کرتے ہوئے مبارکباد دی بعدازاں نائب وزیر اعلیٰ دیویندر فرنویس نے بھی مبارک بادی کا پیغام پوسٹ کیا۔