امریکی صدارتی انتخاب میں فتحیاب ڈونالڈ ٹرمپ نے اعلان کیا ہے کہ وہ صدارتی عہدہ سنبھالنے کے پہلے ہی دن کینیڈا، میکسیکو سے درآمدات پر۲۵؍ فیصد، چین پر۱۰؍فیصد اضافی محصول عائد کریں گے۔ تاکہ امریکہ میں غیر قانونی تارکین وطن اور منشیات کے بہاؤ کو روکا جا سکے۔

امریکہ کے نومنتخب صدر ڈونالڈ ٹرمپ نے وعدہ کیا ہے کہ وہ ۲۰؍ جنوری ۲۰۲۵ء کو صدارتی عہدہ سنبھالنے کے پہلے ہی دن ایگزیکٹو آرڈر پر دستخط کریں گے جس کے تحت کینیڈا، میکسیکو سے درآمدات پر۲۵؍ فیصد، چین پر۱۰؍فیصد اضافی محصول عائد کیا جائے گا، جس کے ذریعے امریکہ میں غیر قانونی تارکین وطن اور منشیات پر قد وغن لگایا جا سکے۔یہ اعلان ٹرمپ نے اپنے سوشل میڈیا پلیٹ فارم ٹروتھ پر پوسٹ کے تسلسل میں کیا۔اس میں انہوں نے کہا کہ’’ میکسیکو اور کینیڈا سے جس سطح پر جرائم اور منشیات امریکہ میں در آئے ہیں ، اس سے قبل کبھی نہیں تھے۔محصولات میں یہ اضافہ اس وقت تک جاری رہے گا جب تک یہ ممالک اس غیر قانونی درآمدات پر روک لگانے کیلئے موثر اقدام نہ کریں۔ یہ ایک سلگتا ہوا مسئلہ ہے، جسے حل کرنے کا ان ممالک کے پاس حق اور طاقت ہے۔اور جب تک وہ اپنے حق کا استعمال نہیں کرتے، انہیں اس کی بھاری قیمت چکانی پڑے گی۔‘‘

یہ بھی پڑھئے: برطانیہ: بنجامن نیتن یاہو کے خلاف مناسب کارروائی کی جائے گی: وزیر خارجہ

مزید برآں، نو منتخب صدر نے چین پر الزام لگایا کہ وہ امریکہ میں منشیات کے بہاؤ کو روکنے میں ناکام رہا ہے۔ٹرمپ نے کہا کہ انہوں نے چین سے کئی مرتبہ اس ضمن میں گفتگو کی جس پر چینی نمائندوں نے بتایا کہ کسی بھی منشیات فروش کو ایسا کرتے ہوئے پکڑے جانے پرموت کی سزا دی جاتی ہے، لیکن بدقسمتی سے، انہوں نے کبھی اس کی پیروی نہیں کی، اور منشیات ہمارے ملک میں، زیادہ تر میکسیکو سے ہوتی ہیں، اتنا اضافہ کبھی نہیں دیکھا گیا۔ جب تک وہ اس پر قد وغن نہیں لگاتے وہاں سے آنے والی تمام مصنوعات پر۱۰؍ فیصد اضافی محصول عائد کیا جائے گا۔ اور اس حکم نامے پر وہ اپنی صدارت کے پہلے ہی دن دستخط کریں گے۔