ویسٹرن اور ہاربر لائن پر ٹرینیں ۲۰؍تا ۲۵؍ منٹ دیر سے چلیں،اسٹیشنوں پر شدید بھیڑ بھاڑ رہی۔

ویسٹرن ریلوے میں چھٹی لائن بچھانے کیلئے جاری بلاک کے دوران ٹرینوں کی رفتار محدود کئے جانے کے سبب پیر کی صبح سے ہی ٹرینیں تقریباً آدھا گھنٹہ تاخیر سے چل رہی تھیں جس کی وجہ سے متعدد ریلوے اسٹیشنوں پر مسافروں کی شدید بھیڑ دیکھنے کو ملی۔
 ٹرینیں دیر سے چلنے کے سبب لوکل ٹرینوں کے مسافروں کو صبح کے وقت دفاتر پہنچنےمیں تاخیر تو ہوئی لیکن ساتھ ہی بے انتہا بھیڑ کی وجہ سے ٹرینوں میں سوار ہونا، اترنا اور جگہ ملنا بھی انتہائی دشوار ہوگیا تھا۔
واضح رہے کہ رام مندر اور کاندیولی کے درمیان ۵؍ویں اور چھٹی لائن بچھانے کا کام جاری ہے جس کی وجہ سے دھیمی اور تیز رفتار والے دونوں طرف کے ریلوے ٹریک پر ٹرینوں کو ۳۰؍ کلو میٹر سے زیادہ رفتار سے نہیں چلایا جارہا ہے۔ اس کام کی وجہ سے ویسٹرن ریلوے پر ۴؍ اکتوبر تک روزانہ ۱۵۰؍ سے ۱۷۵؍ ٹرینیں منسوخ ہونے کا اندیشہ ہے۔ اس کے بعد سے دھیرے دھیرے ٹرینوں کی رفتار کو معمول کے مطابق کردیا جائے گا۔
ریلوے انتظامیہ کا کہنا ہے کہ موجودہ بلاک کی وجہ سے مسافروں کو پریشانیاں ہورہی ہیں لیکن اس کام کے مکمل ہوجانے کے بعد طویل مسافتی اور لوکل ٹرینوں کے ٹریک علیٰحدہ ہوجانے سے ان کی سہولت میں بھی اضافہ ہو جائے گا اور بلاک کے اوقات کو اس لئے زیادہ رکھا جارہا ہے تاکہ یہ کام کم دنوں میں مکمل کیا جاسکے۔