جنوبی امریکی ملک ایکواڈور کے شہر گویاکوئیل میں حکومت کی منشیات فروشوں کیخلاف کارروائی کے بعد خانہ جنگی پھوٹ پڑی۔

جنوبی امریکی ملک ایکواڈور کے شہر گویاکوئیل میں حکومت کی منشیات فروشوں کیخلاف کارروائی کے بعد خانہ جنگی پھوٹ پڑی۔صورتحال اس وقت مزید ابتر ہوگئی جب ۹؍جنوری کو نقاب پوش مسلح افراد کے ایک گروپ نے ایکواڈور کے ٹیلی ویژن اسٹیشن ’ٹی سی‘ کی لائیو نشریات کے دوران دھاوا بول دیا۔ گینگ کے ارکان نے عملے کو یرغمال بنالیا اور انھیں قتل کردینے کی دھمکیاں دیں۔ گینگسٹرز نے لائیو ٹیلیکاسٹ کے دوران جنگ کا اعلان کر دیا جس سے عوام میں خوف وہراس پھیل گیا۔ غیر ملکی میڈیا رپورٹس کے مطابق ملک کے صدر ڈینیل نوبوا نے ۲۲؍ گینگز کو دہشت گرد تنظیمیں قرار دیتے ہوئے کہا ہے کہ ’’ملک خانہ جنگی کی حالت میں ہے۔‘‘ تشدد میں اضافے کے پیش نظر ڈینیئل نوبوا نے فوجی آپریشن کا حکم دیتے ہوئے ۶۰؍دنوں کے لیے ملک بھر میں ایمرجنسی نافذ کرنے کا اعلان کیاہے۔