پائیدھونی پولیس اسٹیشن میںکیس درج کرانے کیلئے رضااکیڈمی کا وفد کوشش کرتا رہا مگرپولیس نے ٹال مٹول کارویہ اپنایا
EPAPER
Updated: October 05, 2024, 9:54 AM IST | Saeed Ahmed Khan | Mumbai
پائیدھونی پولیس اسٹیشن میںکیس درج کرانے کیلئے رضااکیڈمی کا وفد کوشش کرتا رہا مگرپولیس نے ٹال مٹول کارویہ اپنایا
دریدہ دہنی کیلئے مشہور یتی نرسمہانند سرسوتی نے شان رسالت مآبؐ میں پھرگستاخی کرتے ہوئے اپنے ذہنی دیوالیہ پن کا ثبوت دیا ہے۔ اس کے خلاف ایس ڈی پی آئی کی مقامی یونٹ کے صدر داؤد احمد سراج احمد شیخ کی جانب سے ممبرا میںجبکہ رضااکیڈمی کی جانب سے مولانا سید جمیل کے ذریعے جالنہ میں ایف آئی آر درج کرائی گئی ہے۔
ممبئی میں رضا اکیڈمی کے سربراہ محمد سعیدنوری کی جانب سے وزیر اعلیٰ ایکناتھ شندے کو بذریعہ ای میل میمورنڈم دیا گیا اور اسپیشل کمشنر دیوین بھارتی سے ایف آئی آر درج کرانے کی بھی درخواست کی گئی۔ اس پر انہوں نے کہاکہ آپ لوگ پائیدھونی چلے جائیں۔چنانچہ محمدسعید نوری، مولانا خلیل الرحمٰن نوری ،مولانا اعجاز کشمیری اوران کے ہمراہ کئی نوجوان پائیدھونی پولیس اسٹیشن پہنچے مگر ایف آئی آر درج نہیں کی گئی ۔‘‘محمدسعیدنوری نے بتایاکہ ’’ہم لوگ ۲؍ گھنٹے تک پولیس اسٹیشن میں بیٹھے رہے۔ اس دوران سینئر انسپکٹر سے بات چیت کی گئی پھراے سی پی آئیں، ان سے بات چیت کی گئی ۔ان کا کہنا تھا کہ ڈی سی پی صاحب کوبتایا گیا ہے۔ ان کا کہنا ہےکہ پہلے ہمیںیہ دیکھنا ہوگا کہ آواز واقعی یتی نرسمہا نند کی ہے یا نہیں، اس لئے ابھی ایک دن کا اور موقع دیجئے۔ اس طرح دیر تک گفت وشنید جاری رہنے کے باوجود پائیدھونی پولیس نے ایف آئی آر درج نہیںکی ۔ اس پر شرکاء نے ناراضگی کااظہار کیا کہ دیوین بھارتی کے کہنے کے باوجود پائیدھونی پولیس کا رویہ نامناسب رہا اورٹال مٹول سے کام لیا گیا ۔