اس ٹرین کا باضابطہ آغاز ۴؍ستمبر سے ہوگا اور یہ ٹرین بدھ اورجمعہ کو باندرہ ٹرمنس سے ۶؍بجکر ۵۰؍ منٹ پر روانہ ہوگی اوراسی دن رات میں ۱۰؍بجے مڈگاؤں پہنچے گی۔

باندرہ ٹرمنس سےمڈگاؤں کیلئے ویسٹرن ریلوے میں شروع کی گئی پہلی ٹرین کو مرکزی وزیر پیوش گوئل نے بوریولی اسٹیشن پراوروزیرریل پیوش گوئل نے اپنے دفتر سےویڈیو کانفرنسنگ کے ذریعے جمعرات کودوپہر ایک بجکر ۲۵؍منٹ پر ہری جھنڈی دکھاکر روانہ کیا۔ اس نئی ٹرین کا نمبر۱۰۱۱۵؍۱۰۱۱۶؍ ہے۔ اس ٹرین کا باضابطہ آغاز ۴؍ستمبر سے ہوگا اور یہ ٹرین بدھ اورجمعہ کو باندرہ ٹرمنس سے ۶؍بجکر ۵۰؍ منٹ پر روانہ ہوگی اوراسی دن رات میں ۱۰؍بجے مڈگاؤں پہنچے گی۔ نئی ٹرین کے شروع ہونے کے وقت مسافروں میں کافی جوش وخروش نظرآیا۔ وہ خوشی سےنعرے لگارہے تھے۔ 
ریلوے انتظامیہ کے مطابق ا س ٹرین کے شروع ہونے سے ممبئی کے مضافاتی علاقوں میں رہنے والے کوکن واسیوں کا رابطہ بڑھے گااوراس سے تجارت اور سیاحت کوبھی فروغ حاصل ہوگا۔ جمعرات کو چونکہ اس کا اسپیشل رَن تھا اس لئے اس کا نمبر۰۹۱۶۷؍تھا۔ یہ ٹرین وسئی روڈ، بھیونڈی روڈ، پنویل، روہا، ویر، چپلون، رتناگیری، کنکولی، سندھو درگ، ساونت واڑی روڈ، تھیویم اور کرمالی اسٹیشنوں پر رکے گی۔ بکنگ تمام ریزرویشن مراکز اورآئی آر سی ٹی سی کی ویب سائٹ کے ذریعے کرائی جاسکے گی۔