پیر کو ریاستی وزیر خزانہ اجیت پوار نے ریاست کا سالانہ مجوزہ بجٹ پیش کیا جس میں ملک کی تجارتی راجدھانی ممبئی میں ٹریفک کے مسائل کو حل کرنے اور اس کے قریبی شہروں تک بآسانی آمد و رفت کیلئے ۶۴؍ ہزار ۷۸۳؍ کروڑ روپے کے متعدد ترقیاتی پروجیکٹوں کا بھی اعلان کیاگیا ہے

پیر کو  ریاستی وزیر خزانہ اجیت پوار نے ریاست کا سالانہ مجوزہ بجٹ پیش کیا جس میں ملک کی تجارتی راجدھانی ممبئی میں ٹریفک کے مسائل کو حل کرنے اور اس کے قریبی شہروں تک بآسانی آمد و رفت   کیلئے ۶۴؍ ہزار ۷۸۳؍ کروڑ روپے کے متعدد  ترقیاتی پروجیکٹوں کا بھی اعلان کیاگیا ہے۔ ان پروجیکٹوں  میں شہرو مضافات کو جوڑنے اور آمد و رفت کو مزید بہتر بنانے کیلئے ممبئی شہر و مضافات میں متعدد بریج اور زیر زمین روڈ تعمیر کرنے کا اعلان ریاستی بجٹ میں کیاگیا ہے۔ 
 وزیر مالیات اجیت پوار نے بجٹ پیش کرتے ہوئے بتایاکہ ’’ممبئی کو اس کے قریبی شہروں سے جوڑنے کیلئے متعدد پل اور زیر زمین راستے تعمیر کرنے کا ریاستی حکومت نے عزم کیا ہے۔ ان پروجیکٹوں کیلئے ریاست کے مجوزہ بجٹ  میں ۶۴؍ہزار ۷۸۳؍کروڑ روپے کے۵؍  پروجیکٹ شامل ہیں۔ان میںورسوا سے مڈھ کھاڑی بریج، ورسوا سے بھائندر کوسٹل روڈ  اور ملنڈ تا گوریگاؤں، تھانے تا بوریولی اور اورینج گیٹ  سے مرین ڈرائیو  زیر زمین روڈ شامل ہیں۔‘‘ ۔اجیت پوار کے بقول ’’ ممبئی میٹرو پولیٹن ریجن( ایم ایم آر ) میں بین الاقوامی سطح کا مالیاتی ترقیاتی ہب  (گروتھ ہب  ) قائم کیا جائے گا۔ یہ گروتھ ہب : باندرہ  کرلا کمپلیکس ، کرلا یا ورلی ،   وڈالا ، گوریگاؤں، نوی ممبئی ، کھارگھر اور ویرار بوئیسر میں قائم ہوگا ۔