پورے علاقے میں سیاہ بادل چھا گئے،شہریوں کو آنکھوں میں جلن اور سانس لینے میں تکلیف کا سامنا کرنا پڑا

 امبرناتھ کے موریولی ایم آئی ڈی سی میں واقع نیکا کیم  نام کی کیمیکل کمپنی سے گیس کا رساؤ ہونے کی وجہ سے پورے شہر میں دھوئیں کے سیاہ بادل چھاگئے اور شہریوں کی آنکھ  اور گلے میں جلن ہونے لگی۔اس کی اطلاع ملتے ہی فائربریگیڈ کا عملہ  جائے وقوعہ پر پہنچ گیا۔وہیں مہاراشٹر پولیوشن کنٹرول بورڈ (ایم پی سی بی) کلیان ریجن کے آفیسر نے بذات خود پہنچنے کے بجائے اپنے ڈرائیور کو کمپنی کا معائنہ کرنے کیلئے بھیج دیا۔اس لئے اب ایم پی سی بی کے غیر ذمہ دار افسر  کے خلاف کارروائی کا مطالبہ کیا جارہا ہے۔
 موریولی ایم آئی ڈی سی کے پلاٹ نمبر ۴۳؍  پر’ نیکا کیم پروڈکٹس‘ نام کی کمپنی ہے۔ اس کمپنی میں کیمیکل تیار کیا جاتا ہے۔جمعرات کی شب تقریبا ً ۹؍  بجے اچانک کمپنی سے گیس کا ا خراج ہونے لگا اور دھوئیں کے سیاہ بادل چاروں طرف پھیل گئے۔ اس دھوئیں کی وجہ سے شہریوں کو آنکھوں اور گلے میں جلن کےعلاوہ سانس لینے میں بھی تکلیف ہونے لگی۔اچانک سیاہ دھواں پھیل جانے سے شہری خوف زدہ ہوکر گھروں سے باہر نکل آئے۔انہیں سمجھ نہیں آرہا تھا کہ اچانک  پورے شہر میں دھواں کیسے پھیل گیا۔
 ایم آئی ڈی سی، فائر بریگیڈ اور امبرناتھ نگر پالیکا فائربریگیڈ کا عملہ نیکا کیم کمپنی پہنچا اور معائنہ کرنے کے بعد گیس کے رساؤ کو روکنے کے اقدامات کئے۔رات ۱۲؍ بجے کے بعد دھوئیں کی شدت میں کمی آئی۔دوسری جانب ایسی خطرناک کمپنیوں پر کارروائی کرنے  کے ذمہ دار ایم پی سی بی   کے آفیسر  راجپوت کا فون  ناٹ ری چیبل آرہا تھا۔عیاں رہے کہ موریولی ایم آئی ڈی سی میں کئی کیمیکل کمپنیاں واقع ہیں  جن سے گیس کا رساؤ ہوتا رہتا ہے۔ریاستی حکومت نے ان کمپنیوں کو بند کرنے کی ہدایت جاری کی ہے اس کے باوجود کچھ کمپنیاں شروع ہیں۔جس نیکا کیم پروڈکٹس کمپنی سے گیس کا رساؤ ہوا ،اس میں  دن  میں کام جاری رہتا ہے  اور رات میں پلانٹ بند کردیا جاتا ہے۔جس  وقت رساؤ ہوا کمپنی بند تھی۔