صہیونی فوج کی جانب سے ۷؍اکتوبر ۲۰۲۳ء سے فلسطینیوں کا قتل عام جاری ہے۔ فلسطینی وزارت صحت کا کہنا ہے کہ گزشتہ ۴۸؍ گھنٹوں کے دوران قابض اسرائیلی فوج نے ۴؍ نئے قتل عام کئے جن میں درجنوں افراد شہید اور زخمی ہوئے۔

 صہیونی فوج کی جانب سے ۷؍اکتوبر ۲۰۲۳ء سے فلسطینیوں کا قتل عام جاری ہے۔ فلسطینی وزارت صحت کا کہنا ہے کہ گزشتہ ۴۸؍ گھنٹوں کے دوران قابض اسرائیلی فوج نے ۴؍ نئے قتل عام کئے جن میں درجنوں افراد شہید اور زخمی ہوئے۔  غزہ کی وزارت صحت نے سنیچرکو اپنی رپورٹ میں کہا ہے کہ غزہ کے اسپتالوں میں ان قتل عام کے نتیجے میں ۵۲؍شہداء اور۱۱۸؍ زخمیوں کو منتقل کیا گیا۔  وزارت صحت نے بتایا کہ غزہ پر تقریباً ایک سال سے جاری نسل کشی کی جنگ میں ۷؍ اکتوبر ۲۰۲۳ء سے اب تک ۴۱؍ہزار ۵۸۶؍ فلسطینی شہید اور ۹۶؍ہزار ۲۱۰؍ زخمی ہوئے ہیں۔  وزارت نے کہا کہ بہت سے زخمی اب بھی ملبے کے نیچے اور سڑکوں پر ہیں، جہاں ایمبولینس اور شہری دفاع کا عملہ ان تک نہیں پہنچ سکتا۔ 
واضح رہے کہ گزشتہ ۷؍ اکتوبر سے اسرائیلی قابض افواج غزہ پر تباہ کن جنگ کئے ہوئے ہے جس کے نتیجے میں ہزاروں بے قصور شہری شہید، زخمی اور لاپتہ ہونے کے علاوہ ۲۰؍ لاکھ افراد بے گھر ہوچکے ہیں۔ بنیادی ڈھانچے کا ۸۰؍ فیصد سے زیادہ تباہ ہوچکا ہے اور غزہ کی سخت ناکہ بندی اور مسلسل جنگ کے نتیجے میں گنجان آباد علاقہ قحط کی زد میں ہے۔  ادویات، پانی اور خوراک کی قلت کے باعث آئے روز بچوں اور دیگرشہریوں کی اموات کی خبریں آ رہی ہیں۔