ترکی کی وزارت خارجہ نے غزہ میں اسپتال پر اسرائیلی حملہ پر شدید تنقید کی ہے۔ وزارت نے کہا کہ اس سے ثابت ہو جاتا ہے کہ اسرائیل نے عالمی قوانین کی خلاف ورزی کی ہے۔

ترکی کی وزارت خارجہ نے غزہ میں واقع ترکی- فلسطین فرینڈشپ/دوستی اسپتال پر اسرائیلی فوج کے حملے پر سخت تنقید کی۔
وزارت نے بیان میں کہا کہ فلسطینی میڈیا میں گردش کررہی تصویر، جس میں چند اسرائیلی فوجی، غزہ کے ترکی-فلسطین دوستی اسپتال کے سامنے کھڑے ہیں، اس بات کا ثبوت ہے کہ اسرائیل نے عالمی قوانین اور بین الاقوامی انسانی قانون کی خلاف ورزی کی ہے۔ 
وزارت نے مزید کہا کہ مذکورہ اسپتال غزہ میں کینسر کے مریضوں کیلئے معالجہ کا واحد مرکز تھا۔ 

وزارت خارجہ نے زور دیا کہ اسرائیلی فوج کے ذریعے اسپتال کو بھاری نقصان پہنچانا اور اسے فلسطینیوں کے خلاف فوجی اڈے کے طور پر استعمال کرنا، اسرائیل کی مرحلہ وار پالیسی کی طرف اشارہ کرتا ہے جس کا مقصد فلسطین اور اسکی عوام کو صفحہ ہستی سے مٹانا ہے۔ ترکی نے اپنے بیان میں مزید کہا کہ وہ اس حملے کیلئے ذمہ دار افراد کو عالمی عدالت میں انصاف دلانے کیلئے کام کرتا رہے گا۔