اقوام متحدہ کی غزہ سے متعلق رپورٹ میں دل دہلا دینے والا انکشاف اہل غزہ کو اوسطاً۲؍دن میں ایک بار کھانا مل رہا ہے۔

 اقوام متحدہ کی غزہ سے متعلق رپورٹ میں کہا گیا ہے کہ غزّہ کے شہریوں کو۲؍ دن میں صرف ایک بار کھانا میسر ہے۔ رپورٹ کے مطابق گزشتہ۱۱؍ ماہ سے اسرائیلی درندگی کا شکار غزہ کے عوام کو اوسطاً۲؍ دن میں صرف ایک بار کھانا مل رہا ہے۔ اقوام متحدہ کی فلسطینی مہاجرین کے لئے امدادی ایجنسی انروا کے مطابق اسرائیلی حملوں کے باعث بے گھر ہونے والے مہاجرین کی تعداد۲؍ملین تک پہنچ گئی ہے۔ مگر ان مہاجرین کے لئے غذائی امداد کا۸۳؍ فیصد حصہ غزہ میں نہیں پہنچ پارہا۔ ’ انروا‘ کے مطابق غزہ میں اسرائیلی بربریت کا شکار فلسطینی اوسطاً۲؍ دن میں صرف ایک وقت کا کھانا حاصل کر پا رہے ہیں۔ انروا اور اس کے شراکت داروں کی جانب سے ناکافی خوراک کے اثرات میں کمی کے لئے بچوں میں ’ہائی انرجی بسکٹس ‘ تقسیم کئے گئے ہیں۔ واضح رہے کہ غزہ پر۷؍ اکتوبر سے اسرائیلی بربریت کا سلسلہ جاری ہے، ان حملوں کے ساتھ ساتھ متاثرہ علاقے قحط سالی کی صورتحال کا بھی سامنا ہے۔ اسرائیل کی عائد کردہ پابندیوں کی وجہ سے خوراک، پینے کا صاف پانی، حفظان صحت کی اشیاء اور رہائش جیسی بنیادی ضروریات مہیا کرنا انتہائی مشکل ہوگیا ہے۔