ستیہ پال ملک نے مودی کو گفتگو اور ایم ایس پی کی ضمانت کا مشورہ دیا

کم وبیش ۴؍ ماہ سے جاری کسانوں کے احتجاج  کی تائید اب خود بی جےپی کے حامی خیموں سے ہونے لگی ہے۔  میگھالیہ کے گورنر ستیہ پال ملک   نے کسانوں کی حمایت کرتے ہوئے مرکزی حکومت کو ان سے بات چیت بحال کرنے کا مشورہ دیاہے۔ انہوں  نے وزیراعظم مودی اور وزیر داخلہ امیت شاہ کو مشورہ دیا ہے کہ وہ کسانوں کو مزید برہم نہ کریں۔ 
 اتر پردیش کے باغپت میں ایک پروگرام سے خطاب کرتے ہوئے ستیہ پال ملک نے کہا ہے کہ وزیراعظم اور وزیرداخلہ کو کسانوں کو خالی ہاتھ واپس نہیں بھیجنا چاہئے۔ انہوں نے پیش کش کی کہ اگر حکومت کسانوں کو ایم ایس پی کی ضمانت دیدے تو وہ کسانوں کو دہلی کی سرحدوں سے لوٹ جانے کیلئے آمادہ کریںگے۔ 
 ستیہ پال ملک کے مطابق’’کسانوں کو ایم ایس پی کی قانونی ضمانت دیدیجئے میں ضمانت لیتا ہوں کہ حکومت اور کسانوں کے درمیان تنازع ختم کروادوںگا۔‘‘انہوں نےمودی اور امیت شاہ کو متنبہ بھی کیا کہ وہ کسانوں کے خلاف طاقت کا استعمال نہ کریں۔ ملک نے کہا کہ ’’کسانوں کی توہین نہ کریں، سکھ سماج پیچھے نہیں ہٹتا اور ۳۰۰؍ سال تک بھی کسی بات کو نہیں بھولتا۔ جس ملک میں  کسان اور جوان مطمئن نہ ہوںوہ ملک ترقی نہیں  کرسکتا۔‘‘