کہا : ملک میںآیورویدک ادویات کا کاروبار ۵۰؍ سے ۹۰فیصد تک بڑھا ہے

وزیر صحت ڈاکٹر ہرش وردھن نے جمعہ کے روز دعویٰ کیا کہ عالمی ادارۂ صحت  روایتی  طبی نظام کو  فروغ دینے کیلئے ہندوستان میں آیور وید کا عالمی مرکز قائم کرنا چاہتا ہے۔
  ڈاکٹر ہرش وردھن نے  پتانجلی کی کورونا  کی   دوا   کو جاری  کر نے کے  موقع پر منعقدہ  تقریب سے خطاب کرتے ہوئے کہا کہ’  ڈبلیو ایچ او‘ کے سربراہ نے گزشتہ دنوں  وزیر اعظم نریندر مودی سے آیور وید کو فروغ دینے کے سلسلے میں بات  کی  تھی جس میں انہوں نے  ہندوستان کو  اس کا  عالمی مرکز بنانے  پرزور دیا۔      وزیر صحت نے  کہا کہ ۲۰۰۰ء میں  عالمی ادارۂ  صحت  کا  ایک  اجلاس جاپان میں منعقد ہوا   تھا،اس میں ۲۱؍ ویں صدی میں طبی  ہدف کو حاصل کرنے میں روایتی طبی نظام  کو اہم  بتایا گیا  تھا   ۔ اس  کے لئے  آیورویدک طریقۂ علاج کو فروغ دینے اور اس پر سائنسی تحقیق پر زور دینے کی سفارش کی گئی تھی  ۔
      ڈاکٹر ہرش وردھن نے  کا کہنا تھا عالمی ادارۂ  صحت نے آیور وید کو تسلیم  کیا  ہے   ۔ لوگوں کو  صحت مند بنانے  میں آیورویدک  ادویات کے کردار  پر شک نہیں کیا جانا چاہئے ۔ مرکزی وزیر صحت نے یہ بھی دعویٰ کیا کہ  چھٹی صدی  میں  آیور وید کا چینی زبان میں ترجمہ کیا گیا تھا اور بعد میں  فارسی اور یورپی زبانوں میں بھی یہ کام کیا گیا ہے ۔ انہوں نے کہا کہ ملک میں برطانوی حکومت کے دوران ہندوستانی نظام طب کو فروغ نہیں  دیا گیا  ۔ دہلی میں  انہوں نے آیور وید پر تحقیق کے لئے ایک مرکز قائم  کیا تھا   لیکن بعد میں  سرکاروں  نے  اس پر توجہ نہیں دی  ۔  اب بی  جے پی حکومت  دوبارہ ہمارے اس قدیم اثاثے کو فروغ دینے اس سلسلے میں کام کررہی ہیں۔
’ آیوروید  ادویات   کے  کاروبار   اضافہ ہو‘
  وزیر صحت نے کہا کہ دنیا میں آیور وید  کی   قبولیت  میں اضافہ ہورہا ہے  اور کورونا  دور کے بعد ملک میں آیورویدک ادویات کا   کاروبار ۵۰؍ سے ۹۰فیصد کی شرح سے بڑھ رہا ہے ۔  کورونا کے دور سے پہلے  آیورویدک ادویات کا کاروبار ۱۵؍ سے۲۰؍ فیصد کی شرح سے بڑھ رہا تھا  اور آیورویدک کمپنیوں کا مجموعی سالانہ کاروبار۳۰؍ ہزارکروڑ   روپے  کا تھا۔      وزیر صحت کے  مطابق  دنیا میں آیورویدک  ادویات  کی مقبولیت   کی وجہ سے اس  کے کاروبار  میں اضافہ ہو رہا ہے   اور اس  سے برآمدات میں بھی زبردست اضافہ ہوا ہے۔         
         ڈاکٹر ہرش وردھن نے جدید سائنسی  طریقے سے آیور وید کے قیام پر زور دیتے ہوئے کہا کہ اس سے دنیا مستفید ہو گی    اور ملک  کا وقار   بھی بڑھے  گا  ۔ انہوں نے کہا  عالمی ادارۂ صحت سمیت  آسٹریلیا ، نیوزی لینڈ ، کیوبا ، ماریشیس ، نیپال ، بنگلہ دیش ، سری لنکا ، ہنگری وغیرہ جیسے ممالک  نے بھی با ضابطہ  طور پر ا سے تسلیم   کیا ہے   ۔ ہندوستان  کے آیورویدک ڈاکٹر زنیوزی لینڈ میں  امتحان دینے  کے بعد وہاں  خدمات نجام دے سکتے ہیں۔
  وزیر صحت  کے مطابق ملک میں  آیورید اور دیگر طریقہ علاج  کے سلسلے میں پیش رفت جاری ہے اور حکومت کے منصوبے کے تحت اس ضمن میں فیلو شپ اور دیگر منصوبے بھی کامیابی سے جاری ہیں۔  ہرش وردھن کا کہنا تھا کہ حکومت ملک کو طبی شعبہ میں  آگے بڑھانے کیلئے پابند عہد ہے۔ اس سلسلے میں دیگر ترقی یافتہ ممالک اور ماہرین  سے بھی مدد لی جارہی ہے ۔ علاوہ ازیں منتخب  شعبوں میں  تجربات بھی جاری ہیں۔