فرم نے اپنے سوشل میڈیا ہینڈل کے ذریعے پوچھا کہ مادھوی پوری پر اتنے سنگین الزامات عائد ہوئے ہیں لیکن وہ خاموش کیوں ہیں؟

امریکی سرمایہ کاری فرم ہنڈن برگ ریسرچ نے ہندوستانی مارکیٹ ریگولیٹرسیبی کی سربراہ مادھوی پوری پر تازہ تنقیدیں کی ہیں۔ہنڈن برگ نے اپنے  سوشل میڈیا ہینڈل کے ذریعے سوال اٹھایا کہ مادھوی پوری خود پر عائد ہو نے والے سنگین گڑبڑیوں کے الزامات پر خاموش کیوں ہیں؟مادھوی پوری پر یہ حملہ ایسے وقت کیا گیا ہے جب ایک دن پہلے ہی کانگریس نے سیبی کی سربراہ کے خلاف نئے الزامات عائد  کئے  ہیں۔ کانگریس نے دعویٰ کیا ہے کہ مادھوی پوری کی طرف سے پروموٹ کی گئی ایک مشاورتی کمپنی کو اس وقت بڑی رقم ملی، جب وہ سیبی کے بورڈ کی کل وقتی رکن بن چکی تھیں۔ 
 ہنڈن برگ نے اپنی طویل پوسٹ میں کانگریس کے کچھ الزامات کو دہراتے ہوئے کہا ہے کہ اگورا ایڈوائزی پرائیویٹ لمیٹڈ، جس میں مادھوی پوری  کے پاس ۹۹؍ فیصد شیئر ہیں، نے مہندرا اینڈ مہندرا سے لاکھوں روپے وصول  کئے ہیں جبکہ سیبی مہندرا گروپ کے خلاف تحقیقات کر رہی تھی۔ اگورا کے دیگر گاہکوں میں ڈاکٹر ریڈیز، آئی سی آئی سی آئی بینک سیمب کورپ اور ویسو لیزنگ اینڈ فنانس کے نام شامل ہیں۔ان میں سے کئی کمپنیاں شیئرمارکیٹ میں فہرست لسٹیڈ ہیں۔ اس سے مادھوی پوری کو کئی بڑے فائدے ہوئے ہیں۔ 
 مہندرا اینڈ مہندرا اور ڈاکٹر ریڈیز الزامات کا جواب دے چکے ہیں، جنہوں نے کانگریس کے الزامات کو جھوٹا قرار دیا ہے لیکن ہنڈن برگ نے اس رپورٹ کا حوالہ دیتے ہوئے کانگریس کے الزامات کی تصدیق کی کوشش کی ہے اور کہا کہ مادھوی پوری کی خاموشی معنی خیز ہے جبکہ ملک کے مارکیٹ ریگو لیٹر کے عہدے پر بیٹھی کسی بھی شخصیت کو یہ زیب نہیں دیتا کہ وہ اتنے سنگین الزامات لگنے کے باوجود اس طرح سے خاموشی اختیار کرلے۔یاد رہے کہ ہنڈن برگ نے گزشتہ مہینے اڈانی گروپ کے خلاف ایک رپورٹ جاری کی تھی جس میں سیبی کی تحقیقات پر سوال اٹھائے  تھے۔