خشک میوہ جات کی بیگم بازار مارکیٹ کھجوروں کی فروخت کیلئے مشہور ہے جہاں دور دور سے خریدار آتے ہیں۔

رمضان کے دوران حیدرآباد  میں کھجوروں کی قیمتوں میں اضافہ ہو گیا ہے۔ ماہ رمضان المبارک کے موقع پر شہر حیدرآبادکی خشک میوہ جات کی بیگم بازار مارکیٹ میں کھجوروں کی خریداری کیلئے عوام کا ہجوم دیکھاجارہا ہے۔اس ماہ صیام کی مناسبت سے خلیجی ممالک سے کئی اقسام کے کھجور لائے گئے ہیں جن کی کافی مانگ ہے۔بیگم بازار کے ہول سیلرس کے مطابق حیدرآباد، جنوبی ہند کے کسی بھی مقام کے مقابلے کھجوروں کی فروخت میں سرکردہ مقام کا حامل ہے۔  اس سال تمام اقسام کے کھجوروں کی قیمتوں میں۵؍ سے۱۰؍فیصد تک کا اضافہ ہوا ہے۔ان ہول سیلرس نے کہاکہ زیادہ تر گاہک ایرانی اور عراقی کھجور پسند کر رہے ہیں جن کی قیمت زیادہ ہے جبکہ دیگر اقسام کی قیمت کم ہے اور بالخصوص روایتی پینڈ کھجور کی قیمت ان بیرونی کھجوروں کے مقابلہ کم ہے۔
 انہوں نے بتایا کہ سکھری کھجور ۳؍ کلوکے ڈبہ کی قیمت ایک ہزارروپے، قلمی کھجور۵؍کلو کی قیمت ۳۱۰۰روپے،سگُائی کھجور۵؍کلو کے ڈبہ کی قیمت ۳۱؍سوروپے،مضافتی کھجور۵؍کلو کے ڈبہ کی قیمت ۱۳؍سوروپے،کیمیاکھجورکے ڈبہ کی قیمت ۱۵؍ سوروپے ،برنی کھجور۵؍کلو کے ڈبہ کی قیمت ۱۴؍ سوروپے،المجھول کھجور کی قیمت فی کلو۱۳؍سوروپے، پینڈ کھجور کی قیمت فی کلو۹۸؍ روپے ہے۔

یہ بھی پڑھئے: حیدرآباد بمقابلہ راجستھان: رنوں کی بارش

کوئی بھی گاہک اپنے خاندان کی معاشی صورتحال کی مناسبت سے کھجور وں کی خریداری کرتا ہے ۔شہر میں عراق، ایران،تیونس،اردن اور سعودی عرب سے کھجور لائے گئے ہیں۔ ہول سیلرس نے کہا کہ رواں سال تمام اقسام کے کھجوروں کی قیمت میں فیصد تک کا اضافہ ہوا ہے۔کیمیا،کُپ کُپ، خردہ اورمریم کھجور کے ساتھ ساتھ بادام،خشک میوے جات زائد قیمت پر فروخت کئے جارہے ہیں۔ علاوہ ازیں سعودی عرب سے۸؍اقسام کے کھجور بھی شہر میں دستیاب ہیں۔ان ہول سیلرس نے کہاکہ رمضان میں کھجور کی کافی مانگ ہوتی ہے کیونکہ یہ افطاری کا لازمی حصہ ہوتا ہے اور ہر کوئی اس کو پسند کرتا ہے۔ساتھ ہی شیرخرمہ میں بھی کھجور کا استعمال کیاجاتا ہے۔اگرچہ شہر کے مختلف بازاروں میں سال بھر کھجور دستیاب رہتا ہے لیکن ماہ صیام کے موقع پر بڑے پیمانے پر خلیجی ممالک کے کھجوروں کی فروخت میں  اضافہ ہوجاتا ہے۔