مہلوکین میں میاں بیوی کے علاوہ  ۶؍ اور ڈیڑھ سال کی بیٹیاں شامل، قتل سے قبل ملزم نے وہاٹس ایپ اسٹیٹس لگایا کہ ’’۵؍ لوگ مرنے والے ہیں، جلد دکھاؤںگا‘‘

 یوپی کےامیٹھی ضلع میںایک  دلت کنبہ کے ۴؍افراد کو گھر میں  گھس کر گولی ماردی گئی جس کے بعد ریاست میں  لاء اینڈ آرڈر کی صورتحال پر سوال اٹھنےلگا ہے۔  اپوزیشن غم وغصے کا اظہارکرتےہوئے حکومت کی کارکردگی پر سوالات اٹھائے ہیں اور وزیراعلیٰ کے استعفے کا مطالبہ کیا ہے۔  
 جمعرات کی شام  امیٹھی کے شیو رتن گنج تھانہ علاقے میں گھر میں گھس کر جس دلت خاندان کو گولی ماری گئی وہ  پنوہنا کمپوزٹ اسکول کے اسسٹنٹ ٹیچر سنیل بھارتی ، ان کی  اہلیہ اور دو بچوں پر مشتمل تھا۔ یکے بعد دیگرے ۹؍راؤنڈ فائرنگ کر کے پورے خاندان کو  ختم کردیاگیا۔ بیٹیوں کی عمریں ۶؍ سال اور ڈیڑھ سال تھیں۔  ملزم   کے خلاف سنیل بھارتی  اوران کی اہلیہ نے ایک ماہ قبل پولیس میں شکایت درج کرائی تھی اور جان سے مارنے کی دھمکی کا بھی ذکر کیاتھا۔ جمعہ کو قتل کے بعد ملزم چندن ورما کو گرفتار کرلیا ہے۔ قتل سے قبل اس نے وہاٹس ایپ پر اسٹیٹس رکھاتھا کہ ’’۵؍ لوگ مرنے والے ہیں، جلد دکھاؤںگا۔‘‘مقتول کی بیوی پونم  نے چھیڑچھاڑ اور ہریجن ایکٹ کے تحت  چندن کے خلاف اگست میں شکایت درج کرائی تھی ۔ذرائع کے مطابق اسی مقدمہ میں جیل جانے سے قبل اس نے جان سے مارنے کی دھمکی دی تھی اور اب صلح کے لئے دباؤ بنا رہا تھا۔فی ا لحال مقتول سنیل بھارتی کے والد اور ساس کی تحریرپر مقامی تھانہ میں قتل کا مقدمہ درج کرلیا گیا ہے اور قتل کی وجوہات کی تفتیش جاری ہے۔