ہریانہ اسمبلی انتخابات کےچونکا دینے والے نتائج میں کئی بڑے نام جیت گئے تو کچھ ہار بھی گئے ہیں۔جیتنے والوں میں وزیراعلیٰ نائب سنگھ سینی ہیں، جنہوں نے ۵؍ ماہ میں دوسرا الیکشن لڑا ہے

 ہریانہ اسمبلی انتخابات کےچونکا دینے والے نتائج میں کئی بڑے نام جیت گئے تو کچھ ہار بھی گئے ہیں۔جیتنے والوں میں وزیراعلیٰ نائب سنگھ سینی ہیں، جنہوں نے ۵؍ ماہ میں دوسرا الیکشن لڑا ہے۔وزیر اعلیٰ بننے کے بعد انہوں نے کرنال سے ضمنی انتخاب جیتا تھا اور اب لاڈوا سے الیکشن جیتا ہے۔
اسی طرح حزب اختلاف کے لیڈر بھوپیندر سنگھ ہڈا نے روایتی گڑھی سامپلا کلوئی سیٹ سے اپنے قریبی حریف منجو کو۷۰؍ ہزار کے بڑے فرق سے شکست دی ہے۔ اگر یہ کہا جائے تو شاید غلط نہ ہوگا کہ کانگریس کی سب سے زیادہ مقبول امیدوارپہلوان ونیش پھوگاٹ رہیںجنہیں جولانہ سے ایک سخت مقابلے میں بی جے پی کے کپتان یوگیش بیراگی سے۶؍ ہزار سے زائد ووٹوں کے فرق سے کامیابی ملی۔
  ریاست کے سابق وزیر داخلہ اور بی جے پی حکومت میں وزیر اعلیٰ بننے کے خواہشمند انل وج  امبالا چھاؤنی سے سخت مقابلے میں باغی کانگریس امیدوار چترا سرورا سے۷؍ ہزار ووٹوں کے فرق سے الیکشن  جیت گئے۔اسی طرح توشام سے بی جے پی امیدوار شروتی چودھری نے کانگریس امیدوار اور اپنے بھائی انیرودھ چودھری سے سخت مقابلے میں۱۴؍ ہزار ووٹوں کے فرق سے الیکشن جیت گئیں۔سابق اسمبلی اسپیکر گیان چند گپتا پنچکولہ سے کانگریس امیدوار چندر موہن سے الیکشن ہار گئے۔
  ریاستی وزیر کمل گپتا حصار سیٹ سے بری طرح ہار گئے اور تیسرے نمبر پر رہے۔ یہاں سے بی جے پی کی باغی امیدوار ساوتری جندل نے الیکشن جیتا اور کانگریس کے امیدوار رام نواس رارا دوسرے نمبر پر رہے۔ ریاستی وزیر اسیم گوئل امبالہ سٹی سیٹ سے کانگریس کے نرمل سنگھ موہرا سے الیکشن ہار گئے۔ وزیر سبھاش سودھا تھانیسر سے کانگریس امیدوار اشوک کمار اروڑا سے سخت مقابلے میں۳؍ ہزار ووٹوں کے فرق سے ہار گئے۔
 کانگریس صدر ادے بھان ہوڈل سے ڈھائی ہزار ووٹوں کے فرق سے الیکشن ہار گئے۔ہریانہ لوک ہت پارٹی (ایچ ایل پی اے) کے گوپال کانڈا سرسا سے الیکشن ہار گئے۔ انہیں کانگریس کے گوکل سیٹیا نے ہرایا۔
 اسی طرح انڈین نیشنل لوک دل کے پرنسپل جنرل سیکریٹری ابھے سنگھ چوٹالہ ایلن آباد سے کانگریس کے بھرت سنگھ بینی وال سے۱۵؍ ہزار ووٹوں  کے فرق سے ہار گئے۔