نعرہ لگانے کے بعدہی عبدالرشید کی جان بچی مگر ان کا ساراسامان پھینک دیا گیا اور دوبارہ گاؤں نہ آنے کی دھمکی دی گئی

 اندور میں برادران وطن کے اکثریتی علاقے میں چوڑی بیچنے کی پاداش میں تسلیم نامی نوجوان کو زدوکوب کرنے کے بعد اب اُجین میں ایک مسلم کباڑی والے کے ساتھ بھی ایسا ہی معاملہ پیش آیاہے۔ ۲؍ بھگوا شدت پسند نوجوانوں  نے عبدالرشید نامی ایک کباڑی والے کو نہ صرف جے شری رام کہنے پر مجبور کیا بلکہ اس کا سارا سامان پھینک دیا اور اسے دوبارہ گاؤں میں داخل نہ ہونے کی دھمکی دی۔سنیچر کے  اس واقعہ کا ویڈیو منظر عام پر آجانے کے بعد اتوار کو پولیس  نے کیس درج کرکے دونوں ملزمین کو گرفتار کرلیا ہے۔  سب ڈویژنل آفیسر آف پولیس آر کے رائے نے نامہ نگاروں سے گفتگو کرتے ہوئے بتایا کہ ’’یہ واقعہ سنیچر کو پیش آیا جب  اس علاقے میں طویل عرصے سے کاروبار کرنے والا عبدالرشید کباڑ کا کچھ سامان خریدنے کیلئے اپنا منی ٹرک لے کر سکلی گاؤںپہنچا تھا۔‘‘انہوں نے بتایا کہ عبدالرشید کو گاؤں  سے زبردستی نکال دیاگیا اور آئندہ وہاں  کاروبار کیلئے نہ آنے کی دھمکی دی گئی۔ جب وہ گاؤں  سے جارہاتھا تو ۲؍ افراد نے اسے روک لیا ، اس کے ساتھ بدتمیزی کی اور  اسے جے شری رام کہنے پر مجبور کیا۔ عبدالرشید کسی طرح ان کے مطالبے کو پورا کرکے اپنی جان بچانے میں کامیاب ہوا۔  کمال سنگھ (۲۲) اور ایشور سنگھ (۲۷) کے خلاف کیس درج کرکے انہیں گرفتار کرلیاگیاہے۔