وزیراعلیٰ نے جموں کشمیر کیلئے مرکز کے ترقیاتی کاموں  پر وزیراعظم کی ستائش کی

 وزیر اعظم نریندر مودی نے پیر کو وسطی کشمیر کے گاندربل ضلع میں۶ء۵؍ کلومیٹر طویل  زیڈ موڑسونا مرگ سرنگ کا افتتاح کرتے ہوئے کہا کہ وہ اپنے وعدے وفا کرتے ہیں۔ جس پر جموں کشمیر کے وزیراعلیٰ  عمر عبداللہ نے  خطہ کیلئے مرکز کے ترقیاتی کاموں  پروزیراعظم کی ستائش کی مگر انہیں جموں کشمیر کے ریاستی درجہ کی بحالی کا وعدہ بھی یاد دلایا۔ اس کا جواب   وزیراعظم نے افتتاحی تقریب کے بعد منعقدہ عوامی ریلی میں دیا اور کہاکہ ’’میں نے جتنے وعدے کئے ہیں ان سب کو پورا کیا جائے گا۔‘‘ مودی  ریاستی درجہ کی بحالی  کا ذکر کئے بغیر  کہا کہ ’’صحیح وقت پر تمام صحیح چیزیں ہوں گی۔‘‘
 اس موقع پر جموں کشمیر کے لیفٹیننٹ گورنر منوج  سنہا اور سڑک، ٹرانسپورٹ اور ہائی ویز کے مرکزی وزیر نتن گڈکری بھی موجود تھے۔وزیر اعظم نے افتتاح کے بعد سرنگ کا دورہ کیا اور انجینئرس  نیز  مزدروں  سے بات چیت کی۔  ۲۷؍سو کروڑ روپوں کی لاگت سے تیارہونےوالی  اس سرنگ  سے سری نگر  اور سونا مرگ  کے درمیان سال بھر بلا تعطل رابطہ قائم رہ سکے گا۔اس  مقامی تجارت اور سیاحت کو بھی فروغ ملے گا۔
   افتتاحی تقریب سے خطاب کے دوران وزیراعلیٰ عمر عبداللہ نے وزیر اعظم کو مخاطب کرتے ہوئے کہاکہ’’ `آپ نے یہاں یوگا ڈے کے موقع پر دلی کی دوری کو دور کرنے، جموں کشمیر میں اسمبلی انتخابات منعقد کرانے نیزجموں کشمیر کے ریاستی درجے کی بحالی کے تین وعدے کئے تھے ان میں سے ۲؍کو آپ نے پورا کیا اب ریاستی درجے کی بحالی کے تیسرے وعدے کو پورا کرنا ہے۔‘‘نریندر مودی نے بظاہر اسی کے جواب میں کہا کہ ’’ `آپ کو یقین کرنا ہوگا کہ یہ مودی ہے جو اپنے تمام وعدوں کو پورا کرتا ہے۔‘‘ انہوں  نے کہا کہ ’’جموں کشمیر ملک کا تاج ہے اور میں اس تاج کو خوبصورت اور خوشحال دیکھنا چاہتا ہوں۔‘‘
 نریندر مودی نے `جموں و کشمیر  کے حالات کو پُرامن قراردیتے ہوئے کہا کہ ’’ امن کا ماحول چھایا ہوا ہے جس کے  مثبت اثرات کو شعبہ سیاحت پردیکھا جا رہا ہے۔کشمیر ترقی کی نئی تاریخ رقم کر رہا ہے۔‘‘انہوں نے کہا کہ وادی کشمیر کو بہت جلد ٹرین کے ذریعے ملک کے ساتھ جوڑا جائے گا اور اس  تعلق سے یہاں لوگوں میں کافی جوش و خروش ہے۔‘‘ وزیر اعظم نے ان ۷؍لوگوں کو بھی خراج عقیدت پیش کیا جو گزشتہ سال اکتوبر میں یہاں زیڈ موڑ سرنگ کے قریب ایک حملے میں مارے گئے تھے۔