فچ ریٹنگز نے مالی سال ۲۶۔۲۰۲۵ءکیلئے ہندوستان کی جی ڈی پی نمو کیلئے اپنی پیشین گوئی کو ۶ء۵؍ فیصد پر برقرار رکھا ہے۔

فچ ریٹنگز نے  مالی سال ۲۶۔۲۰۲۵ءکیلئے ہندوستان کی جی ڈی پی  نمو کیلئے  اپنی پیشین گوئی کو ۶ء۵؍ فیصد پر برقرار رکھا ہے۔ عالمی درجہ بندی ایجنسی نے اپنی مارچ کی گلوبل  اکنامی  آؤٹ لک رپورٹ میں مالی سال ۲۷ء کیلئے  اپنی ترقی کی پیشین گوئی کو۱۰؍ بیسس پوائنٹس سے بڑھا کر۶ء۳؍ فیصد کر دیا ہے۔
ریٹنگ ایجنسی نے کہا کہ اگرچہ زیادہ جارحانہ امریکی تجارتی پالیسیاں اس کی پیشین گوئی کیلئے  ایک ’بڑا خطرہ‘ ہیں، ہندوستان بیرونی مانگ پر کم انحصار کے پیش نظر کسی حد تک غیر متاثر ہے۔ گلوبل اکنامی آؤٹ لک رپورٹ میں کہا گیا ہے کہ بجٹ میں ٹیکس فری انکم الاؤنسز اور نظرثانی شدہ ٹیکس سلیب میں اضافے سے بعد از ٹیکس آمدنی میں اضافہ ہوگا۔ اس سے صارفین کے اخراجات میں اضافہ ہوگا  تاہم، یہ رفتار گزشتہ سال کے مقابلے میں سست ہو سکتی ہے۔
فچ ریٹنگز کا اندازہ ہے کہ بجٹ بڑے پیمانے پر ترقی کیلئے  غیر جانبدار ہو گا۔ توقع ہے کہ اگلے ۲؍ مالی سالوں میں کیپیکس میں تیزی آئے گی۔ فچ کا کہنا ہے کہ’’کاروباری اعتماد بلند ہے اور قرض دینے والے سروے نجی شعبے کو بینکوں کے قرض میں مسلسل دُہرے ہندسے کی ترقی کی طرف اشارہ کرتے ہیں، یہ عوامل، سرمائے کی لاگت میں کمی کے ساتھ، مالی سال۲۶ء اور مالی سال ۲۷ء کیلئے سرمایہ کاری میں اضافے کا باعث بن رہے ہیں۔ ‘‘اقتصادی سروے نے مالی سال۲۶۔۲۰۲۵ء  کیلئے  جی ڈی پی کی شرح نمو ۶ء۳؍ سے ۶ء۸؍ فیصد رہنے کا تخمینہ لگایا ہے۔ سرکاری اندازوں کے مطابق رواں مالی سال میں جی ڈی پی کی شرح نمو  ۶ء۵؍ فیصد  رہے گی۔ ملک کی حقیقی جی ڈی پی کی شرح نمو جولائی تا ستمبر۲۰۲۴ء کی سہ ماہی میں کم ہوکر۵ء۴؍ فیصد ہوگئی، جو اگلی سہ ماہی میں بڑھ کر۶ء۲؍ فیصد ہوگئی۔