قومی اتحاد دن کی تقریب سے خطاب میں وزیر اعظم نے اپوزیشن کو جم کر نشانہ بنایا

وزیراعظم مودی نے قومی اتحاد دن کے موقع پر یہاں منعقدہ تقریب سے خطاب کرتے ہوئے کہا کہ ہندوستان ایک ملک، ایک سول کوڈ کی طرف بڑھ رہا ہے جو ایک سیکولر سول کوڈہے۔کیواڑیا(ضلع نرمدا، گجرات) میں تقریب سے خطاب کرتے ہوئے مودی نے یہ بھی کہا کہ ہم اب ایک ملک، ایک انتخاب کے  لئےکام کر رہے ہیں، جو ہندوستان کی جمہوریت کو مضبوط کرے گا، جس سے ہندوستان کے وسائل کے بہترین نتائج برآمد ہوں گے اور ملک کو ایک ترقی یافتہ ہندوستان کے خواب کو پورا کرنے میں مدد ملے گی۔پروگرام کے دوران وزیر اعظم نے اتحاد کا عہد لیا اور سردار ولبھ بھائی پٹیل   کے ۱۴۹؍ ویں یوم پیدائش پر ایکتا نگر میں اسٹیچو آف یونٹی پر پھول چڑھائے۔
  مودی نے کہا کہ گزشتہ ۱۰؍ سال ہندوستان کے اتحاد اور سالمیت کیلئے بے مثال کامیابیوں سے بھرے ہوئے ہیں۔ حکومت کے ہر عمل اور مشن میں قومی یکجہتی کا عزم نظر آتا ہے۔ اس دوران مودی نے اپوزیشن پارٹیوں پر شدید تنقید بھی کی اور کہا کہ اربن نکسل حمایت یافتہ لوگ ملک کے اتحاد اور سالمیت کے خلاف ہیں لیکن عوام انہیں اچھی طرح سے پہچانتے ہیں اوربہت جلد انہیں پوری طرح سے ختم کردیا جائے گا۔  مودی نے اس دوران دفعہ ۳۷۰؍ کا بھی ذکر کیا  اور کہا کہ ہم نے اس دفعہ کو ہمیشہ ہمیشہ کے لئے دفنادیا ہے۔ اب اسے کبھی باہر نہیں نکالا جاسکے گا۔ گزشتہ ۷۰؍ سال میں ملک کا قانون وہاں نافذ نہیں ہوتا تھا لیکن ہم نے اب یہ بھی ممکن کر دکھایا ہے اور آگے بھی ہمارے اقدامات جاری رہیں گے۔