اسمبلی کی رکنیت بحال نہیں ہوگی، اہلیہ نسیم سولنکی نے سپریم کورٹ جانے کا اشارہ دیا۔

راجستھان کے ٹونک ضلع کے دیولی اونیارا اسمبلی حلقے میں گزشتہ روز پولنگ کےد وران سب ڈیویژنل مجسٹریٹ ( ایس ڈی ایم) کوتھپڑ مارنے والے آزاد امیدوار نریش مینا کو گرفتار کرلیا گیا جس کےبعد ان کے حامی مشتعل ہوگئے اور ہنگامہ شروع کردیا اور ان کی پولیس کے ساتھ جھڑپ بھی ہوئی ۔ نریش میناکی گرفتاری کے خلاف احتجاج میں دیولی-اونیارا کے سمروتا گاؤں کی سڑک پر ٹائر جلائےاور چکہ جام کردیا۔ شرپسندوں نے پولیس پر پتھراؤ بھی کیا۔ انہیں بھگانے کے لیے پولیس نے ہلکی طاقت کا استعمال کیا اور آنسو گیس کے گولے بھی چھوڑے۔ اس دوران پولیس نے ان کے کچھ حامیوں کو گرفتار بھی کیا ہے۔ نریش مینا کو جمعرات کی دوپہر تقریباً۱۲؍ بجے گرفتار کیا گیا۔ دراصل بدھ کو راجستھان میں ۷؍سیٹوں پر ضمنی انتخابات کیلئے ووٹنگ ہوئی تھی۔ ان میں دیولی-اونیارا اسمبلی بھی شامل تھی۔ نریش مینا اس سیٹ سے آزاد امیدوار کے طور پر الیکشن لڑ رہے ہیں۔ ووٹنگ کے دوران نریش مینا سمروتا کے ایک پولنگ بوتھ پر پہنچے۔ اس دوران ان کی افسران کے ساتھ کسی بات پر بحث ہوئی اور ایس ڈی ایم کو تھپڑ مار دیا۔ چند گھنٹے بعد جب پولیس نے نریش مینا کو حراست میں لیا تھاتو ان کے حامیوں نے شدید احتجاج کرتے ہوئے ا نہیں آزاد کرالیا تھا۔ رات کو ان کے حامیوں نے کئی گاڑیوں کو آگ لگا دی تھی۔ نریش مینا کے حامیوں اور پولیس کے درمیان تصادم میں ۱۰؍ پولیس اہلکاروں سمیت ۵۰؍ افراد زخمی ہوئے ہیں۔ پولیس نے ۶۰؍ افراد کو حراست میں بھی لیا ہے۔