لبنان کے گاؤں پر حملے میں پیرا میڈیکل ٹیم کے ۱۲؍افراد ہلاک، غزہ میں ۲۸ ؍ جبکہ دمشق میں ۱۵؍شہری جاں بحق۔

مشرقی لبنان میں بعلبیک کے ایک گاؤں دوریس میں گزشتہ رات اسرائیلی فضائی حملے میں شہری دفاع کی ٹیموں کے کم از کم۱۲؍ پیرا میڈکس مارے گئے۔ یہ اطلاع لبنانی نیوز ویب سائٹ ’النشرہ‘ نے دی ہے۔ 
 ’النشرہ‘ نے بعلبیک کے گورنر بشیرخودور کے حوالے سے بتایا کہ شہری دفاع کے ۱۲؍ اراکین کی لاشیں ملبے کے نیچے سے نکال لی گئی ہیں اور ملبہ ہٹانے کا عمل اب بھی جاری ہے۔ انہوں نے یہ بھی کہا کہ فضائی حملے کے دوران مرکز میں تقریباً۲۰؍ پیرا میڈکس موجود تھے۔ انہوں نے مزیدکہا کہ بعلبیک میں علاقائی شہری تحفظ کے مرکز کے سربراہ بلال رعد سے رابطہ منقطع ہو گیا ہے۔ 
 دوسری جانب غزہ کی وزارت صحت کے مطابق گزشتہ۲۴؍ گھنٹوں کے دوران غزہ پر اسرائیلی حملوں میں مزید۲۸؍فلسطینیوں کی موت ہوگئی جبکہ ۱۱۲؍ افراد زخمی ہوگئے ہیں۔ القسام بریگیڈ نےجمعہ کو۳؍اسرائیلی فوجیوں کو ہلاک کرنے کا دعویٰ کیاہے۔ دریں اثناءشامی سرکاری میڈیا کے مطابق جمعرات کو شام کے دارالحکومت دمشق کے مضافاتی علاقوں قدسیہ اور مزہ میں اسرائیلی فضائیہ نے کئی عمارتوں کو نشانہ بنایا جس میں ۱۵؍ افراد کی موت ہوگئی جبکہ ۱؍ افراد زخمی ہوگئے۔ اسرائیلی آرمی ریڈیو کے مطابق دمشق میں ہونے والے حملے کا ہدف فلسطینی جنگجو گروپ اسلامی جہاد کا ہیڈکوارٹرز تھا۔