مقبوضہ یروشلم میں واقع الاقصیٰ مسجد میں عید خیام منانے کیلئے سیکڑوں انتہا پسند غیر قانونی یہودی آباد کار پولیس کی حفاظت میں مسجد الاقصیٰ میں جبری طور پر داخل ہوگئے جبکہ مسلمانوں کے داخلے پر پابندی لگائی گئی تھی۔ ان انتہا پسند یہودیوں کا استقبال اسرائیل کے قومی سلامتی کا وزیر اتامار بن گویر نے کیا۔ عینی شاہدین کا کہنا ہے کہ بن گویر خود بھی ان یہودیوں کے ساتھ مسجد میں داخل ہوا تھا۔

فلسطینی ایجنسی کے مطابق عید خیام منانے کیلئے تقریباً ۱۳۹۰؍ غیر قانونی یہودی آباد کار جبری طور پر مقبوضہ مشرقی یروشلم کے مسجد الاقصیٰ کے احاطے میں گھس گئے۔اردن کے محکمہ اثاثہ کے مطابق اتوار کو  یہ یہودی پولیس کی حفاظت میں مغربی دروازہ کےذریعے مسجد میں داخل ہوئے۔ عینی شاہدین کے مطابق انتہا پسند یہودیوں کے ہمراہ قومی سلامتی کا  شدت پسند وزیر اتامار بن گویر بھی شامل ہو گیا ۔ جبکہ مسلمان نمازیوں پر مسجد کے احاطے میں جانے پر پابندی عائد کی گئی تھی۔ 

Hundreds of Israeli settlers, led by far-right minister Itamar Ben Gvir, attacked the Al-Aqsa Mosque in occupied Jerusalem today. pic.twitter.com/VjPQxR0tJ4

— Yunus Arslan (@yunus_arslan_ya) October 20, 2024

جبکہ بن گویر کے دفتر کا کہنا ہے کہ وہ مسجد الاقصیٰ  کے اندر داخل نہیں ہوا تھا لیکن اس نے وہاں آنے والے یہودیوں کا داخلی دروازہ پر استقبال کیا تھا۔ اسرائیلی حکومت نے ۲۰۰۳ء سے غیر قانونی یہودیوں کو روزانہ مسجد الاقصیٰ میں جانے کی اجازت دی ہے سوائے جمعہ اور سنیچر کے۔واضح رہے کہ مسجد الاقصیٰ مسلمانوں کا تیسرا مقدس ترین مقام ہے۔جبکہ یہودی اسے ٹیمپل ماؤنٹ کہتے ہیں، اور ان کا دعویٰ ہے کہ اسی جگہ قدیم زمانے میں دویہودی مندر ہو اکرتے تھے۔
اسرائیل نے مشرقی یروشلم کا وہ علاقہ جہاں مسجد الاقصیٰ واقع ہے ۱۹۶۷ء میں قبضہ کیا تھا، ۱۹۸۰ء میں پورے شہر کا الحاق کر لیا، حالانکہ اسرائیل کے اس قدم کو بین الاقوامی سطح پر تسلیم نہیں کیا گیا ہے۔