ایک سیٹ پر ۴۳۴؍ تو ایک پر۹۶۸؍ووٹوں کے فرق سے امیدوار جیتے۔

جھارکھنڈ میں ۸۱؍ سیٹوں پر ہوئے اسمبلی انتخابات میں پانچ ایسی سیٹیں تھیں جہاں جیت کا فرق ایک ہزار ووٹوں سے کم تھا۔ اس الیکشن میں لاتیہار، ڈالٹن گنج، کانکے، چھترپور اور منڈو اسمبلی سیٹیں ایسی تھیں جہاں امیدواروں کو جیتنے کیلئے سخت محنت کرنی پڑی۔ ان نشستوں پر امیدواروں کے درمیان جیت کا فرق ایک ہزار ووٹوں سے کم تھا۔ لاتیہار اسمبلی سیٹ سے بی جے پی کے امیدوار پرکاش رام نے جے ایم ایم کے امیدوار بیدیا ناتھ رام کو سخت مقابلے میں ۴۳۴؍ووٹوں کے فرق سے شکست دی۔ بی جے پی امیدوار پرکاش رام کو۹۸۰۶۲؍ ووٹ ملے جبکہ جے ایم ایم کے امیدوار بیدیا ناتھ رام کو ۹۷۶۲۸؍ووٹ ملے۔ ڈالٹن گنج اسمبلی سیٹ سے بی جے پی امیدوار آلوک کمار چورسیا نے کانگریس امیدوار کرشنندن ترپاٹھی کو۸۹۰؍ ووٹوں کے فرق سے شکست دی۔ چورسیا کو ایک لاکھ ۲؍ ہزار ۱۷۵؍ ووٹ ملے جبکہ ترپاٹھی کوایک لاکھ ایک ہزار ۲۸۵؍ ووٹ ملے۔ اسی طرح کانکے سے کانگریس کے سریش کمار بیتھا نے بی جے پی کے ڈاکٹر جیتو چرن رام کو سخت مقابلے میں ۹۶۸؍ ووٹوں کے فرق سے شکست دی۔ بیتھا کو ایک لاکھ ۳۳؍ ہزار ۴۹۹؍ ووٹ ملے جبکہ جیتو چرن رام کوایک لاکھ ۳۲؍ ہزار ۵۳۱؍ووٹ ملے۔ 
  چھتر پور سے کانگریس کے رادھا کرشن کشور نے سخت مقابلے میں بی جے پی کی پشپا دیوی کو ۷۳۶؍ ووٹوں کے فرق سے شکست دی۔ کشور کو ۷۱۸۵۷؍ ووٹ ملے جبکہ پشپا دیوی کو۷۱۱۲۱؍ ووٹ ملے۔ اسی طرح منڈو اسمبلی سیٹ سے آل جھارکھنڈ اسٹوڈنٹس یونین (اے جے ایس یو) کے امیدوار نرمل مہتو نے کانگریس امیدوار جے پرکاش بھائی پٹیل کو۲۳۱؍ ووٹوں کے فرق سے شکست دی۔ مہتو کو۹۰۸۷۱؍ووٹ ملے جبکہ پٹیل کو۹۰۶۴۰؍ ووٹ ملے۔