ممبرا -کلوا اسمبلی حلقے سے مہاوکاس اگھاڑی کے امیدوار جتیندر اوہاڑ کی انتخابی مہم پیر کی شام ۶؍ بجے ’’ایک نمبر، ایک نمبر‘‘ کے نعروں  کے ساتھ ختم ہوئی۔

ممبرا -کلوا اسمبلی حلقے سے مہاوکاس اگھاڑی کے امیدوار جتیندر اوہاڑ کی انتخابی مہم پیر کی شام ۶؍ بجے ’’ایک نمبر، ایک نمبر‘‘ کے نعروں  کے ساتھ ختم ہوئی۔  واضح رہےکہ ووٹنگ مشین (ای وی ایم ) پرجتیندر اوہاڑ کا نام اوران کا انتخابی نشان پہلے ہی نمبر  پر ہے۔اسی مناسبت سے پیر کو انتخابی مہم کی آخری ریلی میں اسے نعرے میں  تبدیل کردیاگیا۔ این سی پی (شرد پوار) کے لیڈر جتیندر اوہاڑ  جواپنی سیکولر شبیہ کیلئے  مہاراشٹر ہی نہیں پورے ملک میں  جانے جاتے ہیں، لگاتار ۳؍ بار  اسمبلی میں ممبرا-کلوا حلقے کی نمائندگی کررہے ہیں اورانہیں یقین ہے کہ چوتھی بار بھی ممبرا کے عوام کافیصلہ ان ہی کے حق میں آئےگا۔ پیر کوان کی انتخابی مہم کا آخری پڑاؤممبرا سٹیشن سے وائی جنکشن تک روڈ شو تھا  جس میں ہزاروں کی تعداد میں نوجوان ہی نہیں خواتین اور بزرگوں نے شرکت کی۔  ریلی میں شامل افراد کے مطابق نہ صرف یہ کہ ریلی میں ہزاروں کی تعداد میں لوگوں نے شرکت کی بلکہ جگہ جگہ جتیندر اوہاڑ کے خیرمقدم کیلئے گروپ کی شکل میں لوگ منتظر نظر آئے۔  جتیندر اوہاڑ جن کا شمار شرد پوار کے انتہائی معتمد لیڈروں میں ہوتا ہے،   نے ’’ایک نمبر ،ایک نمبر‘‘ کے نعروں کے بیچ اس  نمائندہ سے گفتگو کے دوران پُر اعتماد لہجے میں کہا کہ ’’ممبرا کے عوام  میرے ہیں اور میں ممبرا کے عوام کیلئے ہوں۔ ۱۵؍ سال میں نے اس بستی کی خدمت کی ہے، یہاں  کے لوگوں کا اعتماد جیتا ہے۔ عوام کی خدمت کا یہ سلسلہ آگے بھی جاری رہےگا۔‘‘