کٹرا ریلو اسٹیشن سے بدھ کو ساڑھے ۱۱؍ بجے ٹرین روانہ کی گئی اوردوپہر ایک بجے بانہال پہنچی،۲۶؍ جنوری سے کشمیر ریل سروس کا آغاز۔

 اودھم پور- سری نگر- بارہمولہ ریل لنک (یو ایس بی آر ایل) پروجیکٹ کے کٹرا- بانہال سیکشن پر بدھ کے روز حتمی فل اسپیڈ ٹرین بطورٹرائل چلائی گئی ۔یہ ٹرائل کمشنر آف ریلوے سیفٹی (شمالی سرکل) دنیش چند دیشوال کے حتمی معائنے کے طور پر انجام دی گئی۔ذرائع نے بتایا کہ کٹرا ریلو اسٹیشن سے بدھ کو ساڑھے ۱۱؍ بجے ٹرین روانہ کی گئی اوردوپہر ایک بجے بانہال پہنچی۔
 بتادیں کہ ہندوستانی ریلوے جلد ہی سری نگر سے کٹرا تک وندے بھارت ایکسپریس ٹرین شروع کرے گا جس کا راستہ تقریباً۱۰۰ ؍ کلو میٹر کا ہو گا اور اس کو طے کرنے میں تقریباً۲؍ گھنٹے۳۰؍  منٹ لگیں گے۔وزیر اعظم نریندر مودی نے پیر کو نئے جموں ریلوے ڈویژن کا ورچوئل ذریعے سے افتتاح کیا تھا۔انہوں نے اس موقع پر کہا تھا کہ اودھم پور- سری نگر- بارہمولہ ریلوے لنک (یو ایس بی آر ایل) پروجیکٹ ایک تاریخی کامیابی ہے جو ہندوستان کی انجینئرنگ کی مہارت کا مظہر ہے۔ادھر شمالی ریلوے نے اس روٹ کیلئے ٹرین کے اوقات کا اعلان کیا ہے ۔ٹائمنگ شیڈول کے مطابق وندے بھارت ایکسپریس ٹرین کٹرا سے صبح ۱۰:۸؍  پر روانہ ہوگی اور ۲۰:۱۱ ؍ پرسری نگر پہنچے گی۔اطلاعات کے مطابق کشمیر ریل سروس کا۲۶؍ جنوری سے آغاز کیا جائے گا۔