کانگریس لیڈر اکشے کانتی بام نے لوک سبھا انتخابات سے قبل پیر کو اندور حلقہ سے اپنا پرچہ نامزدگی واپس لے لیا۔ اس کے بعد بی جے پی شامل ہوگئے۔

خبروں کے مطابق کانگریس لیڈر اکشے کانتی بام نے لوک سبھا انتخابات سے قبل پیر کو اندور حلقہ سے اپنی نامزدگی واپس لے لی ہے۔ کانگریس نے اندور لوک سبھا سیٹ سے بی جے پی کے موجودہ رکن پارلیمنٹ شنکر لالوانی کے خلاف کانتی بام کو میدان میں اتارا تھا، جہاں چوتھے مرحلے میں ۱۳؍ مئی کو پولنگ ہوگی۔ بام کے عہدے سے دستبردار ہونے کے فوراً بعد سینئر بی جے پی لیڈر اور اندور کے ایم ایل اے کیلاش وجے ورگیہ نے پارٹی میں شامل ہونے پر ان کا خیرمقدم کیا۔ انہوں نے ایک گاڑی میں ان کے ساتھ ایک تصویر شیئر کرتے ہوئے سوشل میڈیا پلیٹ فار م ’ایکس‘ پر لکھا کہ ’’ہم وزیر اعظم نریندر مودی، قومی صدر جے پی نڈا اور وزیر اعلیٰ موہن یادو اور ریاستی صدر وی ڈی شرما کی قیادت میں بی جے پی میں اندور سے کانگریس کے لوک سبھا امیدوار شری اکشے کانتی بام جی کا بی جے پی میں خیر مقدم کرتے ہیں۔‘‘ 

इंदौर से कांग्रेस के लोकसभा प्रत्याशी श्री अक्षय कांति बम जी का माननीय प्रधानमंत्री श्री @narendramodi जी, राष्ट्रीय अध्यक्ष श्री @JPNadda जी, मुख्यमंत्री @DrMohanYadav51 जी व प्रदेश अध्यक्ष श्री @vdsharmabjp जी के नेतृत्व में भाजपा में स्वागत है। pic.twitter.com/1isbdLXphb

— Kailash Vijayvargiya (Modi Ka Parivar) (@KailashOnline) April 29, 2024

واضح رہے کہ رواں مہینے کے آغاز میں کانگریس کے سورت سے امیدوار نیلیش کمبھانی انتخابی دوڑ سے اس وقت باہر ہو گئے تھے جب ڈسٹرکٹ ریٹرننگ افسر نے تجویز کنندگان کے دستخطوں میں تضاد پایا تھا۔ اس سیٹ کیلئے پارٹی کے متبادل امیدوار سریش پڈسالہ کا بھی نامزدگی فارم مسترد کر دیا گیا تھا۔ عظیم پرانی پارٹی کیلئے پے در پے دھچکے کے درمیان کمبھانی نے دعویٰ کیا کہ ان کی پارٹی کے ساتھیوں نے انتخابی مہم کے دوران ان کی مدد نہیں کی۔ تاہم، کانگریس نے ان پر جوابی حملہ کرتے ہوئے کہا کہ نامزدگی کی منسوخی کمبھانی کے ’’منصوبہ بندی‘‘ کا حصہ تھی، اور پھر انہیں پارٹی سے چھ سال کیلئے معطل بھی کر دیا۔
کانگریس کے علاوہ، کل آٹھ امیدواروں نے، جن میں زیادہ تر آزاد، بہوجن سماج پارٹی (بی ایس پی) کے پیاری لال بھارتی کے ساتھ، سورت سے اپنی نامزدگی واپس لینے کا فیصلہ کیا۔ اس کے ساتھ ہی ۲۲؍ اپریل کو بی جے پی نے لوک سبھا انتخابات میں اپنی پہلی کامیابی حاصل کی کیونکہ گجرات کے سورت حلقے سے اس کے امیدوار مکیش دلال بلا مقابلہ جیت گئے۔لوک سبھا عام انتخابات کے تیسرے مرحلے کے دوران گجرات میں دیگر سیٹوں کیلئے ووٹنگ۷؍ مئی کو ہوگی جبکہ نتائج کا اعلان ۴؍ جون کو کیا جائے گا۔