کانگریس کے صدر ملکار جن کھرگے نے آج پریس کانفرنس کے دوران کہا کہ حکومت نے کانگریس کو پارلیمنٹ میں اپنی آواز اٹھانے کا موقع فراہم نہیں کیا اس لئے وہ بھارت جوڑو نیائے یاترا نکال رہے ہیں جو لوگوں کے مسائل کو سمجھنے اور انہیں حل کرنے کی کوشش کرے گی۔ کھرگے نےتفتیشی ایجنسیوں کے غلط استعمال پر بھی بی جے پی حکومت کو نشانہ بنایا اور کہا کہ بی جے پی اس کے ذریعے اپوزیشن لیڈران کو ڈرانے کی کوشش کر رہی ہے۔

کانگریسی صدر ملکارجن کھرگے نے کہا کہ حکومت نے ان کی پارٹی کو پارلیمنٹ میں آواز اٹھانے کا موقع فراہم نہیں کیا اس لئے پارٹی نے بھارت جوڑو نیائے یاترا نکالنے کا فیصلہ کیا ہے۔ واضح رہے کہ راہل گاندھی کی قیادت میں کانگریس کی بھارت جوڑو نیائے یاتراکا آغاز ۱۴؍ جنوری کو ہو گا۔ یہ یاترا منی پور سے شروع ہو کر ممبئی میں ختم ہو گی۔ یاترا کا اختتام ۲۰؍ مارچ کو ہوگا۔ یاترا ۶؍ہزار ۷۱۳؍ کلومیٹر کا سفر طے کرے گی۔ کھرگے نے پریس کانفرنس کے دوران کہا کہ اس یاترا کا مقصد ملک کے سماجی، سیاسی اور معاشی مسائل کو اجاگر کرنا ہوگا۔ یاترا میں شرکت کیلئے انڈیا اتحاد کے لیڈران جبکہ شہری سوسائٹی کے ممبران بھی مدعو کئے گئے ہیں۔ کانگریس نے قبل ازیں کہا تھا کہ بھارت نیائے یاترا بھی بھارت جوڑو یاترا کی طرح متاثر کن ہو گی۔
کھرگے نے پریس کانفرنس کے دوران یاترا کے تعلق سے مزید کہا کہ حکومت نے ہمیں اپنی آواز اٹھانے کا موقع نہیں دیا اس لئے ہم نے بھارت جوڑو نیائے یاترا کے ذریعے اپنے مسائل کو اجاگر کرنے کا فیصلہ کیا ہے۔ ہم اس یاترا کے ذریعے لوگوں کو سننے اور ان کے مسائل جاننے کی کوشش کریں گے۔ یاترا میں ۱۱۰؍ اضلاع کور کئے جائیں گے۔

کھرگے نے مودی کو نشانہ بناتے ہوئے کہا کہ منی پور میں ناقابل یقین حادثات پیش آئے لیکن وزیر اعظم نریندر مودی جوہر جگہ تقریراور فوٹو سیشن کرتے ہیں، نے منی پور تشدد پر خاموشی اختیار کی۔ مودی حکومت اور بی جے پی پر الزام عائد کیا کہ وہ اپوزیشن لیڈران کو ڈرانے کیلئے مرکزی تفتیشی ایجنسیوں کا غلط استعمال کر رہی ہے۔ جب ان سے سوال کیا گیا کہ وہ ۲۲؍جنوری کو ایودھیا کے رام مندر کے افتتاح میں شرکت کریں گے یا نہیں تو انہوں نے کہا کہ انہیں مندر کے افتتاح کیلئے مدعو نہیں کیا گیا ہے اور وہ اس بارے میں جلد ہی فیصلہ کریں گے۔