جیورگی میں کلیان پتھ پروجیکٹ کی افتتاحی تقریب میں کانگریس صدر نے کہا کہ اگر سدارامیا اور شیوکمار مختلف سمتوں میں چلتے ہیں تو اس سے پارٹی کمزور ہوگی۔

 کانگریس صدر ملکارجن کھرگے نے پارٹی میں گروہ بندی کے خلاف سخت انتباہ جاری کیا ہے اور خبردار کیا ہے کہ کرناٹک کے وزیر اعلیٰ سدارامیا اور نائب وزیر اعلیٰ ڈی کے شیوکمار کے درمیان کوئی بھی اختلاف پارٹی اور ریاست دونوں کیلئے نقصان دہ ثابت ہو سکتا ہے۔ دیکھا جارہا ہےکہ شیوکمار اپنے وزیر اعلیٰ کے عزائم کے بارے میں آواز اٹھا رہے ہیں جبکہ سدارامیا کے قریبی لیڈروں کا اصرار ہے کہ وہ اپنی پوری پانچ سالہ مدت پوری کریں گے۔ اس معاملے کو پارٹی میں اندرونی اختلافات کے طورپر دیکھا جارہا ہے۔ 
 سنیچر کو یہاں کلیان پتھ پروجیکٹ کی افتتاحی تقریب سے خطاب کرتے ہوئے ملکارجن کھرگےنے سدارامیا اورڈی کے شیوکمار پر زور دیا کہ وہ کرناٹک کی ترقی کے لئے ہم آہنگی کے ساتھ کام کریں۔ انہوں نے کہا کہ اگر سدارامیا اور شیوکمار مختلف سمتوں میں چلتے ہیں تو اس سے پارٹی کمزور ہوگی اور کرناٹک کو نقصان پہنچے گا۔ انہوں نے ریکارڈ۱۶؍ واں بجٹ پیش کرنے کیلئے سدارامیا کی ستائش کی اور ریاست کی حکمرانی کو چلانے میں ان کی قیادت کی تعریف کی۔ انہوں نے سابق وزیر توانائی اور آبپاشی کے ساتھ ساتھ ریاستی کانگریس صدر کے طور پر ان کے دور میں شیوکمار کے تعاون کی بھی تعریف کی۔ اپنے سیاسی سفر کی یاد تازہ کرتے ہوئے کھرگے نے ۲۰۱۹ ءکے عام انتخابات میں اپنی شکست کو یاد کیا اور کلبرگی میں اپنی حمایت کی تصدیق کی۔ انہوں نے کہا کہ جہاں کچھ لوگ خدائی مداخلت پر یقین رکھتے ہیں وہیں وہ لوگوں کی مرضی اور محنت کے ذریعے ترقی پر بھی یقین رکھتے ہیں۔ اس دوران انہوں نے اچھی حکمرانی کی ضرورت پر زور دیا۔