’کوم‘طبقے کے تحفظ کی اپیل کی، ۳؍ دنوں میں ۵؍ ہلاک، متعدد زخمی

 منی پور  میں  تشدد کی نئی لہر کے بیچ  عالمی شہرت یافتہ باکسر ایم سی میری کوم نے منی پور کے حالت پر اظہارِ فکر کرتے ہوئے مرکزی وزیر داخلہ امیت شاہ کو مکتوب روانہ کیا ہے۔انہوں نے امیت شاہ سے مداخلت کا مطالبہ کیا ہے تاکہ یہ یقینی کیا جا سکے کہ سیکوریٹی فورسز دونوں گروپوں (کوکی اور میتئی) کو منی پور کے ’کوم‘ گاؤں میں دراندازی سے روکیں۔اس بیچ منی پور میں تازہ تشدد میں  ۳؍ دنوں میں  ۵؍ ہلاکتیں ہوچکی ہیں۔  ان میں ایک معروف  قبائلی نغمہ نگار اور ایک گاؤں کے دفاعی رضاکار  شامل ہیں جبکہ  زخمیوں کی تعداد ۲۰؍ سے زائد بتائی جارہی ہے۔ 
  میری کوم نے وزیرداخلہ کو خط جمعرات کو لکھا  ہے جس میں امیت شاہ سے واضح لفظوں میں کہا  گیا ہے کہ کوم طبقہ منی پور کا ایک سودیشی قبیلہ ہے اور اقلیتوں میں سب سے چھوٹے قبیلوں میں سے ایک ہے۔ میری کوم نے خط میں یہ بھی لکھا کہ ’’ہم سبھی دونوں حریف طبقات کے درمیان بکھرے ہوئے ہیں... دونوں طرف سے میرے طبقہ کے خلاف ہمیشہ قیاس آرائیاں اور اندیشے ہوتے ہیں، اور سبھی لوگ مسائل کے درمیان میں پھنسے ہوئے ہیں... کمزور داخلی انتظامیہ اور اقلیتی قبائل کے درمیان طبقہ کے شکل میں چھوٹے سائز کے سبب ہم اپنے حلقہ اختیار میں دراندازی کرنے والی کسی بھی طاقت کے خلاف کھڑے ہونے میں اہل نہیں ہیں۔‘‘
 پدم وبھوشن سے نوازی جا چکی میری کوم کا کہنا ہے کہ ’’ہم دونوں نبرد آزما گروپوں کو کوم گاؤں میں دراندازی سے روکنے  کیلئے سیکوریٹی فورسیز کی مدد چاہتے ہیں۔‘‘ سابق راجیہ سبھا رکن میری کوم نے ہندوستانی فوج، نیم فوجی دستہ اور ریاستی فورسز کے سبھی تعینات اراکین سے گزارش بھی کی کہ وہ کوم آبادی کی سیکوریٹی کے لیے اپنی ذمہ داریوں کو نبھانے میں غیر جانبدار رہیں اور ریاست میں امن و معمول والے حالات بنائے رکھنے میں کامیاب ہوں۔ ساتھ ہی میری کوم نے منی پور کے سبھی لوگوں، خصوصاً میتئی و کوکی طبقہ سے ایک ساتھ آنے کی گزارش کی ہے۔