ان ملازمین نے وزارت مالیات کو مشترکہ خط لکھا ، کہا کہ نہ صرف مادھوی پوری بلکہ دیگر اعلیٰ افسران بھی سرعام ڈانٹنے ، چیخنے اور تذلیل کرنے کا رویہ اپناتے ہیں

مرکزی ادارہ سیکورٹیز اینڈ ایکسچینج بورڈ آف انڈیا (سیبی)کے ملازمین نےمرکزی حکومت کو ایک خط لکھا ہے ، جس میں ادارے میں کام کے انتہائی خراب ماحول کی شکایت کی گئی ہے۔ انگریزی اخبار دی اکنامک ٹائمز کی خبر کے مطابق سیبی کے ۵۰۰؍ سے زائد ملازمین نے یہ خط لکھا ہے جس میں کہا گیا ہے کہ سیبی میں اعلیٰ عہدوں پر فائز  افسران کی طرف سے دفتری میٹنگز کے دوران اپنے ماتحتوں  پرچیخنا، انہیں ڈانٹنا اور سرعام  ذلیل کرنا  عام سی بات بن گئی ہے۔ ہر چندکہ یہ خط گزشتہ ماہ ۶؍ اگست کو لکھا گیا تھا لیکن گزشتہ روز ہی منظر عام پر آیا ہے۔ اس خط کے حوالے سے کیا کارروائی ہوئی یہ ابھی تک معلوم نہیں ہو سکا ہے۔ اخبار کا کہنا ہے کہ اس سلسلے میں سیبی نے صرف اتنا کہا ہے کہ ملازمین سے لگاتار مکالمہ کرنا اور ان  کےمسائل کو حل کرنا ایک مسلسل جاری رہنے والا عمل ہے اور یہ مسئلہ حل بھی ہو گیا ہے۔
 وزارت خزانہ کو لکھے گئے پانچ صفحات کے خط میں سیبی کے گروپ ’اے‘ کے آدھے سے زیادہ افسران و ملازمین جن کی تعداد تقریباً ۵۰۰؍ہے، نے کہا ہے کہ گزشتہ ۲؍ سے ۳؍سال کے دوران  جب سے مادھوی پوری  بورڈ میں مقرر ہوئی ہیں اعلیٰ عہدوں پر فائز افسران کی جانب سے چیخنا چلانا، ڈانٹ ڈپٹ کرنا اور سرعام تذلیل کرنا عام بات ہو گئی ہے۔   ان سب کی وجہ سے ملازمین کی نفسیاتی صحت متاثر ہو رہی ہے۔خط میں الزام لگایا گیا ہے کہ پہلے اس طرح کے کچھ ہی کیسیز آفس کے مینٹل ہیلتھ کنسلٹنٹ کے پاس آتے تھے لیکن اب ایسے کیسیز کی تعداد کئی گنا بڑھ گئی ہے۔  ملازمین نے کہا ہے کہ بغیر دلیل کے ہدف تبدیل کردینا  اور غیرحقیقی کام کا بوجھ بڑھانا ملازمین کو ہراساں کرنے کا ایک طریقہ بن گیا ہے۔ ملازمین کی ناراضگی کی خبر ایسے وقت میں سامنے آئی ہے جب سیبی کی چیئرپرسن مادھوی  پوری پہلے ہی تنازع کا شکار ہیں۔