برطانیہ عظمیٰ (انگلینڈ اور ویلز) میں ۲۰۲۳ء میں نومولود لڑکوں میں محمد مقبول ترین نام رہا۔ برطانوی محکمہ شماریات (آفس فار نیشنل اسٹیٹسٹکس -او این ایس) کی جانب سے جاری ڈیٹا کے مطابق محمد انگلینڈ اور ویلز میں لڑکوں کیلئے مقبول ترین نام بن چکا ہے۔

برطانیہ عظمیٰ (انگلینڈ اور ویلز) میں ۲۰۲۳ء میں نومولود لڑکوں میں محمد مقبول ترین نام رہا۔ برطانوی محکمہ شماریات (آفس فار نیشنل اسٹیٹسٹکس -او این ایس) کی جانب سے جاری ڈیٹا کے مطابق محمد انگلینڈ اور ویلز میں لڑکوں کیلئے مقبول ترین نام بن چکا ہے۔ جبکہ لڑکیوں  کے نام میں  اولیویا پہلے نمبر پر رہا۔ ہر سال او این ایس کی جانب سے بچوں کے ناموں  کے متعلق یہ ڈیٹا مرتب کیا جاتا ہے۔ جس میں برطانیہ عظمیٰ میں  مقبول اور غیرمقبول ناموں  کی رینکنگ کی جاتی ہے۔ درحقیقت اگر تمام نومولود لڑکوں اور لڑکیوں کے ناموں کی مجموعی فہرست کا جائزہ لیا جائے تو محمد نام سرفہرست رہا۔ اس سے قبل۲۰۲۲ء میں یہ دوسرا جبکہ۲۰۲۱ء میں پانچواں واں مقبول ترین نام رہا تھا۔ ۲۰۱۶ء سے محمد نام ٹاپ۱۰؍ ناموں میں شامل رہا ہے۔ ڈیٹا کے مطابق محمد انگلینڈ کے۹؍ میں سے۴؍خطوں میں لڑکوں کے لیے مقبول ترین نام رہا جبکہ ویلز میں ۶۳؍واں مقبول ترین نام قرار دیا گیا۔ مجموعی طور پر۲۰۲۳ء میں ۴۶۰۰؍سے زائد لڑکوں کا نام محمد کے طور پر رجسٹر کرایا گیا اور اس طرح اس نے نوح کو پیچھے چھوڑ دیا۔ نوح۴؍ہزار۳۸۲؍ بچوں کے ساتھ دوسرے نمبر پر رہا۔ ۳۵۵۶؍ لڑکیوں کا نام اولیویا رکھا گیا جو مجموعی ناموں میں تیسرے جبکہ لڑکیوں کی فہرست سب سے مقبول نام قرار پایا جس کے بعد ایمیلیا اوراِسلا بالترتیب دوسرے اور تیسرے نمبر پر رہے۔ ۲۰۱۶ء سے اولیویا لڑکیوں کا مقبول ترین نام رہا ہے۔ رپورٹ میں بتایا گیا کہ۲۰۲۳ء میں شاہی خاندان کے نام زیادہ مقبول ثابت نہیں ہوئے۔ جارج، ہیری، آرچی اور شیرولیٹ کی مقبولیت میں کمی دیکھنے میں آئی اور یہ رجحان۲۰۲۳ء میں بھی برقرار رہا۔