Updated: May 30, 2024, 8:37 PM IST
| Mumbai
آج یعنی جمعرات کی نصف شب سے لوکل اور طویل مسافتی ٹرینوں کا ۶۳؍ گھنٹے کا میگا بلاک ہوگا۔ اس دوران ۹۳۰؍ لوکل ٹرین خدمات معطل کی جائیں گی۔ اس کی وجہ تھانے اور سی ایس ایم ٹی کے پلیٹ فارموں میں توسیع ہے۔ ریلوے حکام کی شہریوں سے انتہائی ضروری ہونے پر ہی ٹرین استعمال کرنے کی اپیل نیز بیسٹ انتظامیہ سے اضافی بس سروسیز چلانے کی گزارش۔
آج یعنی جمعرات کی آدھی رات سے ممبئی میں ٹرینوں کا ۶۳؍ گھنٹوں کا میگا بلاک ہوگا، جس سے سینٹرل ریلوے (سی آر) کے ممبئی نیٹ ورک پر پلیٹ فارم کی توسیع کے کاموں کی وجہ سے لوکل ٹرینوں کی خدمات متاثر ہوں گی۔ اس بلاک کی مدت کے دوران مقامی اور طویل مسافتی دونوں ٹرینوں کی خدمات میں خلل پڑنے کی توقع کے ساتھ، ریلوے نے مسافروں پر زور دیا ہے کہ جب تک ضروری نہ ہو لوکل ٹرینوں سے سفر کرنے سے گریز کریں۔ واضح رہے کہ اس کارروائی سے ہزاروں مسافروں کے روزمرہ کے معمولات میں خلل پڑنے کا خدشہ ہے۔
پلیٹ فارم نمبر ۵؍ اور ۶ (تھانے میں) میں توسیع کیلئے ۶۳؍ گھنٹے کا میگا بلاک جمعرات کی آدھی رات سے شروع ہوگا جبکہ پلیٹ فارم نمبر ۱۰؍ اور ۱۱ (سی ایس ایم ٹی) کی توسیع سے متعلق کاموں کیلئے ۳۶؍ گھنٹے کا بلاک شروع ہوگا۔ واضح رہے کہ ممبئی میں یومیہ ۱۸۰۰؍ لوکل ٹرین سروسیز چلائی جاتی ہیں جن سے ۳۰؍ لاکھ سے زائد مسافر روزانہ سفر کرتے ہیں۔ سینٹرل ریلوے کے حکام کے مطابق، عام حالات میں، تھانے اسٹیشن پر پلیٹ فارم کو چوڑا کرنے کے کام کو مکمل ہونے میں تین سے چھ ماہ درکار ہوں گے۔ تاہم، سی آر ایک نئی ٹیکنالوجی کا نفاذ کر رہا ہے جس کی مدد سے وہ تین دن سے بھی کم وقت میں کام ختم کر سکتے ہیں۔
بلاک کی تفصیلات
(۱) میگا بلاک جنوبی ممبئی اور تھانے اسٹیشن میں چھترپتی شیواجی مہاراج ٹرمنس (سی ایس ایم ٹی) پر پلیٹ فارم کی توسیع کی سرگرمیوں میں سہولت فراہم کرے گا۔
(۲) سینٹرل ریلوے نے ۹۳۰؍ لوکل ٹرین خدمات کو منسوخ کرنے کا اعلان کیا، بشمول ۱۶۱؍ جمعہ کو، ۵۳۴؍ سنیچر کو اور ۲۳۵؍ اتوار کو سی ایس ایم ٹی اور تھانے میں میگا بلاک کے دوران۔
(۳) ریلوے نے بیسٹ اور مہاراشٹر اسٹیٹ روڈ ٹرانسپورٹ کارپوریشن سے مسافروں کی سہولت کیلئےاضافی بسیں تعینات کرنے کی درخواست کی۔