اثنا عشری ویلفیئر سوسائٹی نے این سی پی امیدوار کے سامنے اپنے مسائل رکھے، حمایت کی یقین دہانی کرائی۔

ممبرا میں انتخابی مہم میں  شدت کے دوران اتوار کوشیعہ اثنا عشری ویلفیئر سوسائٹی نے اپنی میٹنگ میں راشٹروادی کانگریس پارٹی کے امیدوار نجیب ملّا کو مدعوکیا۔ انہوں نے متل گراؤنڈ کے شیعہ قبرستان کی دیوار کے انہدام کامعاملہ اٹھایا اور کمیونٹی سینٹر کی ضرورت سے آگاہ کیا۔ ملاقات میں سوسائٹی کے جنرل سیکریٹری سید مظہر عباس، سید علی محمد اچھن (صدر سوسائٹی)، سید کرار حسین، سید رہبر اور راجیو سید موجود تھے۔ 
 اس کی تفصیل فراہم کرتے ہوئے ممبرا شیعہ اثنا عشری ویلفیئر سوسائٹی کے جنرل سیکریٹری سید مظہر عباس نے بتایا کہ’’ ہم نے این سی پی امیدوار نجیب ملّا کے سامنے سارا معاملہ پیش کیا نیز یہ بھی بتایا کہ یہاں ایک شیعہ کمیونٹی سینٹر کی اشد ضرورت ہے۔ نجیب ملّا نے وعدہ کیا ہے کہ ہم آپ کے اس مطالبے پر ضرور دھیان دیں گے اور آپ اپنی آنکھوں سے دیکھیں گے کہ نجیب ملّا نے جو وعدہ کیا تھا اسے پورا کیا۔ ‘‘ انہوں  نے بتایا کہ میٹنگ میں متل گراؤنڈ شیعہ قبرستان کی دیوار کے انہدام پر بھی تفصیل سے گفتگوہوئی اور این سی پی امیدوار کو اس کے پس پشت عوامل سے آگاہ کیاگیا۔ میٹنگ میں  بتایاگیا کہ قبرستان کی تعمیر میں قانونی طور پر راجن کینے کا بڑا تعاون رہا جس کی وجہ سے ان کا شکریہ ادا کیاگیا اوراس کے نتیجے میں  ہونےوالی سیاست میں  قبرستان کی دیوار کو غیر قانونی قرار دے کر منہدم کروادیاگیا تاہم اسے دوبارہ تعمیر کروا لیا گیا ہے۔ سید مظہر عباس نے بتایا کہ مثبت یقین دہانیوں  کے بعد شرکائے میٹنگ نے انہیں   تعاون کی یقین دہانی کرائی ہے۔ میٹنگ میں این سی پی (اجیت پوار) کے مائناریٹی ڈپارٹمنٹ کے قومی صدر ایڈوکیٹ سید جلال الدین بھی موجود تھے۔