انتخابات میں پارٹی کی شکست سے دل برداشتہ ہوکر یہ فیصلہ کیا، معافی بھی مانگی۔

 اوڈیشہ کے سابق وزیر اعلی نوین پٹنائک کے قریبی بی جے ڈی لیڈر وی کے پانڈین نے فعال سیاست سے ریٹائرمنٹ کا اعلان کردیا ہے۔ لوک سبھا اور اسمبلی انتخابات میں بی جے ڈی کی کراری شکست کے بعد پارٹی سپریمو نوین پٹنائک کے قریبی وی کے پانڈین نے فعال سیاست چھوڑنے کا اعلان کیا ہے۔ اس کا اعلان انہوں نے انتہائی جذباتی انداز میں کیا ہے۔ بتادیں کہ بیجو جنتا دل کو لوک سبھا انتخابات میں کراری شکست کا سامنا کرنا پڑا ہے۔ نیز اوڈیشہ اسمبلی انتخابات میں نوین پٹنائک کو بھی بڑا جھٹکا لگا ہے۔ پٹنائک کو تقریباً ڈھائی دہائیوں میں سیاست میں ایسی شکست کا سامنا کرنا پڑا ہے۔
 بی جے ڈی لیڈر فعال سیاست سے ریٹائرمنٹ کا اعلان کرتے ہوئے جذباتی ہو گئے۔ انہوں نے کہا کہ اب میں نے فعال سیاست سے خود کو دور کرنے کا فیصلہ کیا ہے۔ اس سفر کے دوران اگر میں نے کسی کو تکلیف پہنچائی ہے تو میں اس کے لیے معذرت خواہ ہوں۔ انہوں نے مزید کہا کہ اگر اس انتخابی مہم میں میرے ذریعہ دیے گئے بیانات سے بی جے ڈی کو کوئی نقصان پہنچا ہے یا وہ پارٹی کا شکست کا سبب بنا ہو تو اس کیلئے بھی میں معذرت خواہ ہوں۔تمل ناڈو میں پیدا ہوئے وی کے پانڈین آئی اے ایس رہ چکے ہیں۔ اس کے باوجود انہوں نے ادیشہ کی سیاست میں اپنی پہچان بنائی۔ سابق آئی اے ایس افسر پانڈین کا شمار نوین پٹنائک کے سروس کے وقت سے ہی ان کے قریبی افراد میں کیا جاتا ہے۔ وی کے پانڈین ادیشہ کیڈر کے ۲۰۰۰ء بیچ کے آئی اے ایس افسر تھے۔ ان کی پہلی پوسٹنگ ۲۰۰۲ء میں کالاہانڈی میں ہوئی تھی۔وی کے پانڈین اور نوین پٹنائک کے روابط کی شروعات ۲۰۰۷ء میں شروع ہوئی تھی جب وی کے پانڈین کو گنجام ضلع کا کلکٹر بنایا گیا تھا جو نوین پٹنائک کا آبائی ضلع ہے۔