معاہدے کا باضابطہ اعلان اپریل میں کیا جائے گا جب فرانسیسی وزیر دفاع ہندوستان کا دورہ کریں گے، معاہدے کی مالیت تقریباً ۷ء۶؍ارب ڈالر ہوگی۔

ہندوستانی بحریہ اپنے پرانے مگ۲۹؍ لڑاکا طیاروں کو فرانس کے رافیل سے تبدیل کرنے کی تیاری کر رہی ہے۔ حکومت بحریہ کیلئے۲۶؍نئے رافیل طیارے خریدے گی۔ توقع ہے کہ اس معاہدے کا باضابطہ اعلان اپریل میں کیا جائے گا جب فرانسیسی وزیر دفاع ہندوستان کا دورہ کریں گے۔ اس پورے معاہدے کی مالیت تقریباً ۷ء۶؍ارب ڈالر ہوگی۔ 
یہ نئے رافیل طیارے پرانے مگ ۲۹؍ کے اورمگ ۲۹؍ کے یو بی طیاروں کی جگہ لیں گے۔ یہ پرانے طیارے اس وقت ہندوستانی بحریہ کے ۳۰۰؍ اسکواڈرن(آئی این اے ایس ۳۰۰) `وائٹ ٹائیگرز اور۳۰۳؍ اسکواڈرن(آئی این اے ایس ۳۰۳) `بلیک پینتھرس میں استعمال ہو رہے ہیں۔ نئے رافیل جیٹ طیارے آئی این ایس وکرانت اور آئی این ایس وکرمادتیہ نامی طیارہ بردار جہازوں سے اڑان بھریں گے۔ یہ بڑے بڑے جہاز سمندر میں تیرتے ہوائی اڈوں کی طرح ہوتے ہیں ۔ ان ۲۶؍رافیل طیاروں میں سے۲۲؍ رافیل ایم طیارے ہوں گے۔ باقی ۴؍ طیارے رافیل بی ٹرینر طیارے ہوں گے۔ یہ۲؍ نشستوں والے طیارے ہیں جو پائلٹوں کی تربیت کیلئے استعمال ہوتے ہیں۔ 
ٹرینر ہوائی جہاز طیارہ بردار جہاز سے اڑ نہیں سکتے۔ ان نئے طیاروں کی ترسیل ۲۰۲۹ء میں شروع ہو جائے گی۔ 
رافیل کمپنی ہندوستان میں فیکٹری لگائے گی
رافیل طیارہ بنانے والی کمپنی ڈسالٹ ایوی ایشن ہندوستان میں ایک اسمبلی لائن قائم کرنے پر بھی غور کر رہی ہے۔ اس کا مطلب ہے کہ کچھ رافیل طیارے ہندوستان میں ہی بنائے جائیں گے۔ یہ اس لئے کہ ہندوستان سمیت کئی ممالک سے رافیل طیاروں کے آرڈرز موصول ہو چکے ہیں۔ میک ان انڈیا پالیسی کے تحت خریدے جانے والے ہتھیاروں کا۶۰؍ فیصد ہندوستان میں تیار کیا جانا چاہئے۔