کہا کہ راہل اور پرینکا اسی لئے وہاں سےجیتتے ہیں، بعد میں صفائی پیش کی

مسلمانوں کے خلاف زہر افشانی کے ذریعہ اپنا  سیاسی قد بلند کرنے والے نتیش رانے فرنویس کابینہ میں  وزیر بننے کے باوجود باز نہیں آئے۔  راہل گاندھی اورپرینکا گاندھی کی وائناڈ سے جیت پر تنقید کرتے ہوئے پورے کیرالا کو ’’منی پاکستان‘‘ قراردے دیا۔ ملک کی ایک اہم ریاست کو پاکستان قرار دینے کی ان کی اس حرکت پر اپوزیشن نے سخت اعتراض کرتے ہوئے بی جےپی سے اس پر اپنا موقف واضح کرنے کا مطالبہ کیا ہے جبکہ غلطی کا احساس ہونے کے بعدخودنتیش  نے صفائی دینے کی کوشش کی ہے۔
 پونے میں ایک ریلی سے خطاب کرتے ہوئے  رانے   نےکہا کہ’’کیرالا منی پاکستان ہے تبھی تو راہل گاندھی اوران کی بہن وہاں سے منتخب ہوتی ہیں۔ سارے دہشت گرد ان کوووٹ دیتے ہیں۔  وہ دہشت گردوں کو ساتھ لینے کے بعد ہی ایم پی بنے ہیں۔‘‘ واضح طور پر سمجھا جاسکتاہے کہ ریاستی وزیر مسلمانوں کیلئے ’’دہشت گرد‘‘ کا لفظ استعمال کر رہے تھے۔   اس سلسلے میں سوال اٹھنے کے بعد   منگل کو انہوں نے صفائی پیش کرنے کی کوشش کی مگر کامیاب نظر نہیں آئے۔ ریاستی وزیر نے کہا کہ وہ کیرالا اور پاکستان کا موازنہ کررہے تھے۔ان کےمطابق’’کیرالا یقیناً ہندوستان کا حصہ ہے مگر ہندوؤں کی گھٹی تعداد فکرمندی کا باعث  ہے۔و ہاں ہندوؤں کا مسلمان اور عیسائی ہوجانا روز کا معمول بن گیا ہے۔ ‘‘