ابو عاصم اعظمی نے گورنر کو میمورنڈم دے کر زہر افشانی اور بنگلہ دیشیوں کے نام پر مسلمانوں پر تشدد کرنے والوں کے خلاف کارروائی کا مطالبہ کیا

پہلگام میں دہشت گردانہ حملے کے بعد ممبئی اور ریاست میں بی جےپی لیڈروں کے ذریعے مسلمانوں کے خلاف زہر افشانی اور بنگلہ دیشی بتا کر مسلمانوں کو پیٹنے کے واقعات کی روک تھام کیلئے  سماجوادی پارٹی کے لیڈروںپر مشتمل ایک وفد نے پیر کو راج بھون میں گورنرکے نام ایک میمورنڈم دیا ۔
 سماجوادی پارٹی کے ریاستی صدر و رکن اسمبلی ابو عاصم اعظمی کی قیادت میں گئے وفد نے گورنر سے مطالبہ کیاکہ مسلمانوں کیخلاف نفرت پھیلانے اور ریاست کے امن و امان کو غارت کرنے کی کوشش کرنے والے وزیر نتیش رانے سے فوراً  استعفیٰ لیاجائے اور مسلمانوں کے ساتھ مار پیٹ کرنے والے بی جے پی اور دیگر فرقہ وارانہ افراد کے خلاف سخت کارروائی کرنے کی  ریاستی حکومت کو ہدایت دی جائے ۔ وفد نے گورنر کے سیکریٹری ڈاکٹر نانا ورے سے ملاقات کی اور گورنر کے نام کا میمورنڈم انہیں دیا۔
 اس سلسلے میں ابو عاصم اعظمی نے کہا کہ ’’پہلگام میں بزدلانہ حملے کی پورے ملک میں مذمت ہو رہی ہے اور مسلمانوں کی جانب سے زیادہ شدت سے اس حملہ کی مخالفت کی جارہی ہے۔  اس حملے کے بعد جب پورے ملک کو متحد ہو کر پاکستا ن کو منہ توڑ جواب  دینے کی ضرورت ہے  بی  جے پی کے لیڈر مسلمانوں کیخلاف نفرت کا ماحول پیدا کرنے کی کوشش کر رہے ہیں اور بنگلہ دیشیوں کے نام پر مسلمانوں کو تشدد کا نشانہ بنایا جا رہا ہے۔  دادر میں بنگلہ دیشیوں کے نام پر مسلمانوں کو مارا پیٹا گیا ۔اتنا ہی نہیں ہاکروں او ر خوانچہ فروشوں کو تشدد کا نشانہ بنایاجارہا ہے۔‘‘
  ابو عاصم اعظمی نےمزید کہا کہ پہلگام حملہ میں دہشت گردوں نے جان بوجھ کر مذہب پوچھ کر قتل کیا  تاکہ ہندوستان میں فرقہ وارانہ کشیدگی پیدا ہو  اور نتیش رانے اور بی جے پی کے عہدیدار اس سازش کو کامیاب کرنے کی کوشش کر رہے ہیں۔ پہلگام میں حملہ ہوا لیکن کشمیریوں نے سیاحوں کی مدد کی اور سید عادل حسین شاہ نے اپنی جان نچھاور کر کے سیاحوں کی حفاظت کی۔ کشمیریوں نے مصیبت زدہ سیاحوں پر اپنے گھروں کے دروازے کھول دئیے لیکن وزیر نتیش رانے مسلمانوں کے بائیکاٹ کی بات کر رہے ہیں۔ وہ مسلم تاجروں سے خریداری بند کرنے کی نصیحت کر رہے ہیں۔ اتنا ہی نہیں نتیش رانے نے ہندوؤں سے اپیل کی ہے کہ خریداری سے قبل دکانداروں سے ہنومان چالیسہ کا جاپ کرنے کو کہا جائے اور جاپ کرنے والے دکاندار سے ہی اجناس خریدیا جائے۔‘‘سماجوادی پارٹی کے ریاستی صدر نے کہاکہ ہم نے گورنر سے درخواست کی ہے کہ چونکہ وہ مہارشٹر کے نگراں ہیں اور حکومت کے وزیر ہی مسلمانوں کیخلاف منافرت پیدا کرنے کا کام کر رہے ہیں اور وزیر اعلیٰ  سے شکایت کرنے کے باوجود کوئی کارروائی نہیں کی جا رہی ہے اس لئے ہم نے گورنر مداخلت کرنے اور نتیش رانے کو وزارت سے فوراً مستعفی کرنے  کا مطالبہ کیا۔