پاکستانی کرکٹر شعیب ملک اور ہندوستانی ٹینس اسٹار ثانیہ مرزا کے تعلقات منقطع ہونے کی خبریں ۲۰۲۲ء میں منظر عام پر آئی تھیں۔ تاہم، فریقین کی جانب سے خبروں کی تصدیق یا تردید نہیں کی گئی تھی۔ آج صبح شعیب ملک اور پاکستانی اداکارہ ثناء جاوید نے اپنے انسٹا گرام پر نکاح کی تصاویر شائع کیں۔ اس کے بعد ثانیہ کے والد عمران مرزا نے خلاصہ کیا کہ ثانیہ مرزا نے شعیب ملک سے خلع لیا ہے۔

پاکستانی کرکٹ ٹیم کے سابق کپتان شعیب ملک نے ہندوستانی ٹینس اسٹار ثانیہ مرزا سے علاحدگی کے بعد پاکستان کی مشہور اداکارہ ثناء جاوید سے نکاح کرلیا۔ شعیب ملک اور ثانیہ مرزا کا پانچ سالہ بیٹا اپنی ماں کے ساتھ رہائش پذیر ہے۔ شعیب ملک نے اپنے انسٹاگرام اکاؤنٹ پر ثناء جاوید کے ساتھ تصاویر پوسٹ کی ہیں۔ ثانیہ مرزا کے والد عمران مرزا نے پی ٹی آئی کو بتایا کہ شعیب ملک نے ثانیہ کو طلاق نہیں دیا ہے بلکہ ثانیہ نے شعیب سے خلع لیا ہے۔ 

- Alhamdullilah ♥️

"And We created you in pairs" وَخَلَقْنَاكُمْ أَزْوَاجًا pic.twitter.com/nPzKYYvTcV

— Shoaib Malik 🇵🇰 (@realshoaibmalik) January 20, 2024

واضح رہے کہ شعیب ملک اور ثانیہ مرزا کی علاحدگی کی خبریں ۲۰۲۲ء میں منظر عام پر آئی تھیں اور گزشتہ۲؍برسوں سے دونوں کو ساتھ نہیں دیکھا گیا ۔ کچھ عرصہ قبل شعیب ملک نے انسٹاگرام پر ثانیہ مرزا کو ’’اَن فالو‘‘ کردیا تھا۔ 
یاد رہے کہ ثانیہ مرزا اور شعیب ملک کا نکاح ۲۰۱۰ء میں ہوا تھا، اور دونوں دبئی میں رہائش پذیر تھے۔ ثانیہ سے قبل عائشہ صدیقی، شعیب ملک کے نکاح میں تھیں جنہیں طلاق دینے کے بعد شعیب نے ثانیہ سے نکاح کیا تھا۔ ثناء جاوید نے پاکستان کی کئی فلموں اور ڈراموں میں کام کیا ہے۔ ۲۰۲۰ء میں انہوں نے گلوکار عمر جیسوال سے شادی کی تھی۔لیکن دو مہینے بعد ہی ان میں طلاق ہوگئی تھی۔ واضح رہے کہ ثانیہ مرزا نے پچھلے سال ٹینس کو الودع کہا تھا۔