یہاں ٹپال ناکہ پر کافی عرصے کے بعد پنویل میونسپل کارپوریشن نے غیر قانونی گالوں کے خلاف زبردست انہدامی کاروائی کرتے ہوئے انہیں توڑ دیا۔

یہاں ٹپال ناکہ پر کافی عرصے کے بعد پنویل میونسپل کارپوریشن نے غیر قانونی گالوں کے خلاف زبردست انہدامی کاروائی کرتے ہوئے انہیں توڑ دیا۔ یہاں ۲؍ ہزار۳۶؍ سکوائر فٹ پر واقع ۹؍ گالوں کو زبردست پولیس بندوبست میں جے سی بی، ڈمپر اور پوکلین کی مدد سے توڑ دیا گیا۔ ان گالوں کے مالکان نے انہدامی کارروائی کی بھنک لگتے ہی اسٹے حاصل کرنے کیلئے ہائی کورٹ میں ایک رٹ پٹیشن داخل کی تھی لیکن ہائی کورٹ نے ان کی عرضی خارج کر دی۔ 
 مونسپل کمشنر ڈاکٹر منگیش چٹلے کے مطابق یہ گالے غیر قانونی تھے۔ ان راستوں کو کشادہ کر کے انہیں کنکریٹ کا بنایا جائے گا۔ مقامی سماجی کارکن زبیر پٹونے کہاکہ یہ کارروائی ضروری تھی۔ یہاں ہمیشہ ٹریفک جام رہتا تھا۔ یہاں تک کہ ایمبولنس کو بھی جانے کو راستہ نہیں ملتا تھا۔ اب امید ہے کہ ٹریفک کا مسئلہ حل ہو جائے گا۔ ایک اور سماجی کارکن نوید عبدالقادر پٹیل کے مطابق یہاں سے ایک اہم گاؤں کرن جاڈے کافی قریب ہے۔ یہاں پر ٹپال ناکے کااہم راستہ پرہمیشہ ٹریفک رہتا تھا۔ راہ گیروں کو بھی بہت تکلیف ہوتی تھی۔