سویدھا ایکسپریس ٹرینوں کے برے حشر پر پینل نے کہا کہ کرایہ کم نہیں کیا گیا تو مسافر ہوائی جہاز کو ترجیح دینے لگیں گے۔ دیگر ٹرینوں کے کرایوں پر بھی تجاویز

وزیر ریل اشوینی ویشنو بھلے ہی ٹرینوں کا کرایہ بڑھانے کے اشارہ دے رہےہوں لیکن پارلیمانی پینل کو لگتا ہے کہ ریلوے ڈائنامک کرایے کے ذریعے مسافروں کو لوٹ رہا ہے۔ اسے فوراً بند کرنے کا مشورہ پینل نے دیا ہے اور یہ مشورہ بھی دیا ہے کہ اس کی جگہ ’فلیکسی ‘ کرایہ نافذ کیا جائے تاکہ مسافروں کو بھی فائدہ ہو اور ریلوے کا کوئی نقصان نہ ہو ۔ واضح رہے کہ فلیکسی کرایے کا مطلب یہ ہے کہ جب ٹکٹوںکی ڈیمانڈ زائد ہو تو ٹکٹوں کے دام میں اضافہ ہو جائے لیکن جب ڈیمانڈ کم ہویا ٹکٹیں فروخت نہیں ہو رہی ہوں تو کرایے کو خود بخود کم کردیا جائے۔  یہ طریقہ پرائیویٹ ٹرانسپورٹ بسوں اور ہوائی جہاز کے ٹکٹوں میں اپنایا جاتا ہے۔ اس سے مسافروں کو بھی فائدہ پہنچتا ہے اور بس یا جہازمیں سیٹیں خالی نہیں رہتی ہیں۔ 
 حالانکہ پینل نے یہ مشورہ سویدھا ٹرینوں کے لئے دیا ہے جس میں ڈائنامک کرایہ نافذ کیا جاتا ہے اور یہ کسی بھی مقام کے لئے چلائی جانے والی  متوازی ٹرین کے مقابلے میں ۳؍ سے ۵؍ گنا تک زائد ہو جاتا ہے۔  اسے حالانکہ مسافروں کی سہولت کے لئے شروع کیا گیا ہے لیکن اس کی وجہ سے مسافروں سے ضرورت سے زیادہ ٹکٹ وصول کیا جارہا ہے جبکہ سہولت کے نام پر کوئی فائدہ نہیں دیا جاتا ہے۔ اسی لئے سویدھا ٹرینوں کے خلاف گزشتہ کافی وقت سے آواز اٹھ رہی ہے۔ مسافروں کی تنظیمیں بھی اسے سہولت نہیں بلکہ استحصال قرار دیتی ہیں۔
  پینل کی یہ رپورٹ گزشتہ دنوں ہی پارلیمنٹ کو سونپی گئی ہے اور اس میں واضح طور پر کہا گیا ہے کہ ریلوے کو اپنی سیٹوں کی فروخت بڑھانے کے لئے فلیکسی کرایہ اور دیگر طریقوں کو اپنا نا ہو گا ۔ اس سے مسافروں کو کافی سہولت ملے گی ورنہ اگر وہ ڈائنامک کرایے پر اصرار کرتی رہی تو ممکن ہے کہ ریلوے کے بہت سے مسافر ہوائی جہاز کو ترجیح دینے لگیں کیوں کہ ڈائنامک کرایہ وہاں بھی نافذ ہوتا ہے لیکن وہاں وقت بہت کم لگتا ہے جبکہ سویدھا ٹرینیں اکثر تاخیر سے ہی چلتی ہیں۔ پینل نے وزارت ریلوے کو اس تعلق سے نوٹس بھی بھیجا تھا جس کے جواب میں ریلوے نے یہ مشورہ ماننے کے بجائے اپنی تاویلیں پیش کی ہیں لیکن پینل نے اسے قبول نہیں کیا ہے۔