سیوڑی مشرق اور مغرب کےعلاوہ کالاچوکی کے علاقوں میں بھی پانی کی غیر اعلانیہ کٹوتی جاری ہے۔

سیوڑی مشرق اور مغرب کے علاوہ کالاچوکی کے علاقوں کے مکینوں نے شہری انتظامیہ پر غیر اعلانیہ طورپر پانی کی کٹوتی کرنے کا الزام عائد کیاہے۔ یہاں کے مکینوں کا کہنا ہے کہ پانی کی سپلائی معمول کے وقت سے تقریباً ۱۰؍سے ۳۰؍ منٹ کم ہے۔ جس کی وجہ سے ان علاقوں کے مکینوں کو پانی کی شدید قلت کا سامنا کرنا پڑ رہا ہے۔ شیوسینا(ٹھاکرے گروپ) کے سابق کارپوریٹر سچن پڈول کےمطابق ’’گرمی بڑھ رہی ہے ایسےمیں پانی کی قلت ہونے سے یہاں کےمکینوں کو پریشانی کا سامنا کرناپڑرہاہے۔ ریتی بندر علاقے میں شام۶؍ بجے سے رات ۹؍ بجے کے درمیان پانی کی سپلائی فراہم کی جاتی ہےلیکن ان دنوں یہاں پانی کی سپلائی رات پونے ۹؍بجے منقطع ہوجاتی ہے۔ سیوڑی گڈی اڈہ میں پانی کی فراہمی کے اوقات شام ۷؍سے ۹؍بجے تک ہےمگر یہاں بھی پانی کم سپلائی ہورہاہے۔ اندرا نگر، حاجی بندر روڈ، فورسبیری روڈ پر پانی کی فراہمی صبح پونے ۷؍تا سے پونے ۹؍بجے تک ہوتی ہے یہاں بھی ۱۵؍سے ۳۰؍منٹ پہلے پانی کی سپلائی بندہوجاتی ہے۔ اس لئے سچن پڈوال نے بی ایم سی کے ایف ساؤتھ وارڈ آفس سے مطالبہ کیا ہے کہ پانی کی سپلائی جلد از جلد بحال کی جائے، ورنہ آندولن کیاجا ئے گا۔ ‘‘