وزیراعظم مودی کا دعویٰ، اپوزیشن پر ’’جھوٹا بیانیہ‘‘گھڑنے کا الزام لگایا، کہا: ۱۹۶۹ء کا فساد ۶؍ ماہ چلا تھا۔

مشہور پوڈ کاسٹر اور اے آئی کے محقق لیکس فریڈمین کے ساتھ اتوار کو ایک پوڈ کاسٹ میں وزیر اعظم نریندر مودی نے اپوزیشن پارٹیوں   پر ۲۰۰۲ء کےگجرات فساد کے حوالے سے ’’جھوٹا بیانیہ‘‘گھڑنے کا الزام عائدکیا اور دعویٰ کیا کہ ۱۹۶۹ء کا فساد ۶؍ ماہ تک چلاتھا۔ اس کے ساتھ ہی انہوں نے الزام لگایا کہ اپوزیشن انہیں  پھنسا کر سزا دلانا چاہتا تھا مگرعدالتوں نے ان کی بے گناہی کو قبول کیا۔ انہوں  نے یہ دعویٰ بھی کیا کہ ۲۰۰۲ء کے بعد گجرات میں  کوئی بڑا فساد نہیں  ہوا ہےا ورا س کا سہرا انہوں  نے اپنے سر باندھنے کی کوشش کی۔ 
 پوڈ کاسٹ میں  مودی نے ہند-چین تعلقات اور امریکی صدر ڈونالڈ ٹرمپ کے ساتھ اپنی دوستی کے بارے میں بھی گفتگو کی۔ ہند-پاک تعلقات پر وزیر اعظم نے کہا کہ ’’ پاکستان نے ہندوستان کے ساتھ تنازع کا راستہ منتخب کیا ہے۔ ‘‘ چین سے تعلقات پر انہوں  نے کہا کہ ’’ میں نے ابھی صدر شی جن پنگ سے ملاقات کی ہے۔ تب سے سرحد پر حالات بہتر ہوئے ہیں۔ ‘‘ 
  وزیراعظم نے پوڈ کاسٹ میں  آر ایس ایس سے اپنی وابستگی پر کھل کر گفتگو کی اور کہا کہ آر ایس ایس میں ہمیں سکھایا گیا کہ جو بھی کرو، مقصد کے ساتھ کرو۔