دارالحکومت دہلی میں وزیراعظم کے ہاتھوں  وزارت کامرس کے نئے کیمپس ’وانجئے بھون‘ کا افتتاح عمل میں آیا

وزیراعظم نریندر مودی نے جمعرات کے روز ایک پروگرام میں خطاب کرتے ہوئے  کہا کہ ’ووکل فار لوکل‘ مہم سے برآمدات کو بڑھانے میں بھی مدد ملی ہے اور اب دنیا کے نئے نئے ملکوں میں ہمارے متعدد مصنوعات  پہلی بار برآمد کئے جارہے ہیں۔
 موصولہ تفصیلات کے مطابق وزیراعظم مودی نے جمعرات کو یہاں  وزارت کامرس کے نئے کیمپس ’وانجئے بھون‘ کا افتتاح کیا۔ اس موقع پر انہوں نے کہا کہ حکومت ووکل فار لوکل مہم کے تحت ون ڈسٹرکٹ ون پروڈکٹ یوجنا کے ذریعہ  مقامی مصنوعات پر زور دے رہی ہے۔ انہوں نے کہا کہ پچھلے آٹھ سال میں ہندوستان نے مسلسل اپنا برآمدات بڑھانے کے ساتھ ہی اس سے جڑے اہداف کو حاصل کیا ہے۔ انہوں نے مزید کہا،’’ برآمدات بڑھانے کےلئے بہتر پالیسیوں اور عوامل کو آسان  بنانے کے ساتھ ہی پیداوار کو نئے بازار میں پیش کرنے میں کافی مدد ملی ہے۔‘‘ وزیراعظم نے اپنے خطاب میں یہ دعویٰ بھی کہا کہ’’ آج حکومت کی ہر وزارت اور محکمہ  ،برآمدات بڑھانے کو ترجیح دے رہا ہے۔خارجہ ،زراعت یا کامرس کی وزارت ہو یا چھوٹی ،درمیانی  اور بہت چھوٹی صنعتوں  کی وزارت ،سبھی ایک مشترکہ اہداف  کےلئے اجتماعی کوشش کررہے ہیں۔‘‘