تمام مقامی ذمہ داران، مساجد کے ٹرسٹیان اور قبرستان کیلئے جدوجہدکرنےوالوں کی گزشتہ دنوں میٹنگ میں مل جل کرکوشش کرنے پراتفاق۔

یہاں قبرستان کا مطالبہ منوانے کیلئے متحد ہوکر کوشش کرنے پراتفاق کیا گیا ۔اس تعلق سے دو دن قبل انجمن خیرالاسلام اسکول میں بلائی گئی میٹنگ میںذمہ داران نے اظہارخیال کرتے ہوئے یہ واضح کیاتھا کہ مل جل کرکوشش کرنے سے ہی آواز میں قوت پیداہوگی اور اجتماعی کوشش کا اثر انفرادی کوشش سےکہیں زیادہ ہوگا ۔جن حضرات نے کوشش کی وہ قابل تحسین ہے۔ اس لئے اب بھوک ہڑتال ، بڑے پیمانے پر احتجاج اور وزیراعلیٰ سے ملاقات کے لئے تیاری کی جارہی ہے۔ 
مذکورہ میٹنگ کی خاص بات یہ رہی کہ مسئلے کی سنگینی اوردیرینہ مطالبے کو دیکھتے ہوئے وکھرولی قبرستان کمیٹی کی دعوت پرمیٹنگ میں تمام مسلکوں کی مساجد ومدارس، وکھرولی مشرق ومغرب، کانجور مارگ مشرق ومغرب، گودریج گاؤں، سوریہ نگر، کروے نگر ، کنموار نگر اور پوائی سےذمہ دار شخصیات نے بڑی تعداد میں شرکت کی۔ 
میٹنگ میں عبدالرحمٰن انصاری، واجد قریشی ، جمیل احمد، ڈاکٹر وقار احمد، عزیزاللہ عرف اجو ،پروفیسر نثار احمد، عبدالرحیم، عمران شیخ، عبدالحق ، شارق قریشی، اشفاق احمد اورمحمد عارف صدیقی نے اظہار خیال کیا ۔سبھی نے اجتماعی کوششوں کی وکالت کی جس پرحاضرین کی جانب سے کہا گیا کہ اس دفعہ شروع کی جانے والی مہم مطالبہ پورا ہونے کے بعد ہی ختم کی جائے تاکہ ۵۰؍برس پرانا مسلمانوں کایہ مسئلہ حل ہو اور ان کومیت کی تدفین کیلئے ۵؍ کلومیٹر دور گھاٹکوپر نہ جانا پڑے۔