برطانوی شہزادے ولیم نے خلا کی سیاحت کی دوڑ میں شامل ہونے والی دنیا کی امیر ترین شخصیات کو تنقید کا نشانہ بناتے ہوئے اپیل کی ہے کہ لوگوں کو پہلے کرہ ارض کی حالت بہتر کرنے پر توجہ دینے کی ضرورت ہے

برطانوی شہزادے ولیم نے  خلا کی سیاحت کی دوڑ میں شامل ہونے والی دنیا کی امیر ترین شخصیات کو تنقید کا نشانہ بناتے ہوئے اپیل کی ہے کہ لوگوں کو پہلے کرہ ارض کی حالت بہتر کرنے پر توجہ دینے کی ضرورت ہے۔شہزادہ ولیم نے یہ بات لندن میں ماحولیات کے ارتھ شاٹ پرائز ایوارڈ کی افتتاحی تقریب سے قبل ایک انٹرویو میں آب و ہوا کی تبدیلیوں پر تشویش کا اظہار کر تے ہوئے کہی۔ انہوں ماحولیات کے مسائل سے اپنے خاندان کی دیرینہ وابستگی پر بھی گفتگو کی۔ واضح رہے کہ ماحولیات سے متعلق اسکاٹ لینڈ کے شہر گلاسگو میں اس ماہ کے آخر میں ایک بین الاقوامی کانفرنس ہو رہی ہے، جسے ماحولیات کے بہت سے ماہرین آب و ہوا کی تبدیلی کے خلاف جنگ کا رخ موڑنے کیلئے دنیا کا آخری موقع قرار دے رہے ہیں۔شہزادہ ولیم نے کہا کہ،’’ہمیں دنیا کے کچھ ایسے بڑے ذہنوں کی ضرورت ہے جو اس کرۂ ارض کی مرمت کی کوششوں پر مرکوز ہوں نہ کہ ایسے مقام کی تلاش میں مصروف رہیں، جہاں مستقبل میں جا کر بسیرا کیا جا سکے۔‘‘ واضح رہے کہ ولیم  اپنے والد کے بعد برطانیہ میں بادشاہت کے دوسرے امیدوار ہیں۔  ماحولیات کیلئے فکر من اشخاص کے درمیان ان کی کہی ہوئی یہ بات انتہائی اہمیت کی حامل سمجھی جا رہی ہے۔