لوک سبھا انتخابات کے چھٹے مرحلے کی مہم ختم ہونے کے بعد راہل گاندھی نے یہ سفر کیا، اپنے تجربات بیان کئے اور کہا کہ میٹرو ریل شروع کرنے پر انہیں فخرہے۔

 دہلی کی سات لوک سبھا سیٹوں پر انتخابی مہم جمعرات کو ختم ہونے کے بعد کانگریس کے لیڈر اور رکن پارلیمنٹ راہل گاندھی نے پارٹی امیدوار کنہیا کمار کے ساتھ دہلی میٹرو میں سفر کر کے سب کو حیران کر دیا۔ انہوں نے میٹرو میں سفر کے دوران مسافروں سے کافی دیر تک گفتگو کی۔ انہوں نے مسافروں سے ان کے مسائل پوچھے۔ اس دوران راہل گاندھی کافی خوش نظر آئے۔ اس کے علاوہ راہل گاندھی کو میٹرو میں کنہیا کمار کے ساتھ کھل کر بات کرتے بھی دیکھا گیا۔انہوں نے مسافروں کے ساتھ اپنی گفتگو اور دہلی میٹرو کے سفر کے حوالے سے ’ایکس‘ اورانسٹا گرام پر ایک پوسٹ بھی شیئر کی ہے۔ اپنی پوسٹ میں انہوں نے لکھا کہ’’ دہلی میٹرو، ایک وقت دہلی کے لوگوں کی ضرورت تھی، پھر بنی عادت اور اب محبت۔ سبھی کے ساتھ آج اس چھوٹے سے سفر میں بہت مزہ آیا۔ عوام کی راحت کے  لئے ایسی سہولت شروع کرنے  مجھے فخر ہے۔ کانگریس ان کی حفاظت کے  لئے ہمہ وقت تیار ہے اور نئی سہولیات بنانے کے  لئے پابند عہد۔‘‘اس کے علاوہ راہل گاندھی نے ’ایکس‘ پر اپنے کاؤنٹ پر بھی اس سفر کی کچھ فوٹوز شیئر کی ہیں۔ 
 ان  تصویروںکے ساتھ انہوں نے لکھا  کہ میٹرو سفر، دہلی کے دل والوں کے ساتھ۔ ساتھی مسافروں سے مل کر ان کا حال چال پوچھا۔ مجھے خوشی ہوتی ہے یہ دیکھ کر کہ دہلی میں میٹرو بنانے کی ہماری پہل عوام کی آمد ورفت کےلئےاتنی سہولت کی حامل ثابت ہوئی۔ اس موقع پر مسافروں نے بھی راہل اور کنہیا کمار کے ساتھ کافی جوش و خروش کے ساتھ گفتگو کی اور ان سے بھی حال چال پوچھا۔ اس دوران کئی مسافروں نے راہل گاندھی کے ساتھ تصویریں کھنچوائیں جبکہ کئی نوجوان راہل کو دیکھنے کیلئے بے قرار نظر آئے۔