دو دن قبل بہار دورے کے موقع پر مظاہرہ کرنے والے ’بی پی ایس سی‘ کے امیدواروں سے کانگریس لیڈر نے ملاقات کی تھی۔

لوک سبھا میں اپوزیشن کے لیڈر راہل گاندھی نےمنگل کو الزام عائد کیا کہ امتحان کا پرچہ لیک ہونا، نوجوانوں کے حقوق چھیننے کا ایک ہتھیار بن گیا ہے۔ انہوں نے الزام لگایا کہ بی جے پی کی حکومت والی ریاستوں میں اس طرح کے واقعات روزانہ رونما ہو رہے ہیں۔ انہوں نے مظاہرہ کرنے والے بہار پبلک سروس کمیشن (بی پی ایس سی) کے امیدواروں کے مسئلے کو پارلیمنٹ میں اٹھانے کا اعلان بھی کیا۔ 
بہار پبلک سروس کمیشن کے امتحان میں مبینہ بے ضابطگیوں کے خلاف پٹنہ میں تقریباً ایک ماہ سے مظاہرہ ہورہا ہے۔ کانگریس لیڈر نے مذکورہ مظاہرین سے ۱۸؍ جنوری کو ملاقات کی تھی، ان سے بات چیت کی تھی، ان کے مسائل سنے تھے اور ان سے کچھ وعدے بھی کئے تھے لیکن اس تعلق سے بیان اور ویڈیو ۲۱؍ جنوری کو جاری کیا۔ 
 اپنے بیان میں راہل گاندھی نے کہا کہ گاندھیائی انداز میں احتجاج کرنے والے طلبہ پر بہار کی حکومت نے وحشیانہ لاٹھی چارج کیا اور پھر ان کے خلاف زبردستی مقدمات بھی درج کئے۔ انہوں نے کہا کہ مجموعی طورپر۲۸؍ امتحانی مراکز میں دھاندلی ہوئی لیکن حکومت اسے تسلیم کرنے کیلئے تیار ہی نہیں ہے۔ انہوں نے کہا کہ یہ ویڈیو ان ہزاروں طلبہ کی آواز ہے جو انصاف اور دوبارہ امتحان کا مطالبہ کر رہے ہیں۔