پرویش ورما اور دیگر کی امیدوں پر پانی پھر گیا، آج حلف برداری۔

سینئر لیڈروں کو نظر انداز کرکے کسی نئے چہرے کو وزیراعلیٰ بنانے کی اپنی حالیہ روایت کو برقرار کھتے ہوئے بی جےپی نے دہلی میں ریکھا گپتا کو وزیراعلیٰ بنانے کافیصلہ کیا ہے۔  شالیمار باغ اسمبلی حلقہ سے جیتنےوالی ریکھا گپتا کے نام کا اعلان بدھ کی شام کیاگیا۔ جمعرات کو حلف برداری عمل میں  آئے گی۔ ریکھاگپتا کے نام کے اعلان کے ساتھ ہی پرویش ورما سمیت سینئر لیڈروں  کی امیدوں  پر پانی پھر گیا ہے۔ 
 جمعرات کو صبح ۱۱؍ بجے حلف برداری کی تقریب شروع ہوگی اور لیفٹیننٹ گورنر وی کے سکسینہ ۱۲؍ بجکر ۳۵؍ منٹ پر نئے وزیر اعلیٰ کے علاوہ کابینہ کے کچھ دیگر وزراء کو حلف دلائیں گے۔ پہلے حلف برداری کیلئے ساڑھے ۴؍ بجے کا وقت طے کیاگیاتھا۔ بی جے پی کے مبصر روی شنکر پرساد اور اوم پرکاش دھنکر نے بدھ کو پارٹی اراکین اسمبلی سے فرداً فرداً بات چیت کے بعد ریکھا گپتا کے نام پر مہر لگائی۔